Sang Huebes, Disiembre 17, 2020, ang European Court of Human Rights (ECHR) nagpagua sang desisyon sini sa kaso nga Tretiak v. Ukraine. Ang desisyon pabor kay Brother Oleksandr Tretiak. Sang Nobiembre 26, 2013, samtang nagapauli pagkatapos niya preaching, wala kaluoy nga ginkastigo sia sang tatlo ka tawo. Suno sa desisyon sang ECHR, indi husto ang pag-imbestigar sang awtoridad sang Ukraine sa sini nga krimen. Gani ginpabayad sila sang korte sang 7,500 ka euro ($9,100 U.S.) nga danyos.

Grabe gid ang pagkastigo kay Brother Tretiak amo nga isa ka bulan gid sia nga naospital. Tatlo ka bulan pa pagkatapos sang insidente antes gin-imbestigaran sang mga pulis ang natabo. Indi sila mag-aku nga ang motibo sa pagkastigo kay Brother Tretiak amo ang iya relihion bilang isa sa mga Saksi ni Jehova. Para sa ila indi gid man grabe ang iya mga pilas. Sang ulihi, gindeklarar pa sang mga pulis nga indi gid man serioso nga krimen ang nahimo batok kay Brother Tretiak. Isa pa, isa lang sa mga nagkastigo sa iya ang ginkasuhan, kag ginpasakaan lamang ini sing kaso pagkatapos nga nakapalagyo ini sa iban nga pungsod. Ang duha nga nagkastigo sa iya, nga ang isa pulis, ginkabig lamang nga mga witness sa krimen. Wala gid sila nasilutan sa ila nahimo nga krimen. Bangod sini, ginpasaka ni Brother Tretiak ang iya kaso sa ECHR sang 2015.

Sa desisyon sang ECHR, nagsiling ini nga “indi husto ang pag-imbestigar sang mga awtoridad [sang Ukraine] sa pagpamintas nga gin-antos sang biktima.” Maathag nga wala gid ini nabase sa European Convention on Human Rights.

Nagalaum kita nga ini nga desisyon makabulig para maproteksionan ang kinamatarong sa relihion sang aton mga kauturan sa Ukraine kag sa iban pa nga pungsod. Ang pinakaimportante sa tanan, ginapasalamatan naton si Jehova nga naghatag sa aton sing hustisya.—Panalambiton 3:59.