Sang Pebrero 24, 2022, nagsugod ang inaway sa Ukraine. Linibo ka mga Saksi ni Jehova ang ara gihapon sa mga lugar nga may grabe nga pag-inaway. Ang isa ka grupo sang 21 ka kauturan halin sa mga siudad sang Kremenchuk kag Poltava sa Ukraine nagpakita sang matuod nga gugma sa ila mga kauturan. Handa sila nga magkadto sa lugar nga may mga inaway para i-rescue ang ila mga kauturan kag magpanagtag sang mga relief supply.

Nakahimo na sila sing 80 ka biyahe sa sulod sang anom ka semana sa mga lugar nga grabe ang inaway pareho sa Kharkiv. Kon tingubon ang mga biyahe nagalab-ot na ini sa 50,000 ka kilometro, kag naka-rescue na sila sang mga 400 ka kauturan.

Asta sa sini nga report, naka-deliver na sila sing 23 ka tonelada sang pagkaon, mga bulong, gasolina, kag iban pa nga mga suplay. Antes sila magbiyahe, ginaplano anay nila kon diin ang pinaka-safe nga ruta, para malikawan nila ang mga lugar nga may inaway. Ang isa ka biyahe mahimo maglawig sing mga 19 ka oras, bangod kinahanglan nila magdulog sa mga checkpoint kay gina-search ang ila mga salakyan.

Samtang nagabiyahe sila, ang mga eroplano nga nagapamomba nagalupad sa ibabaw. Makit-an sang mga kauturan ang mga bilding nga ginbombahan kag ang guba nga mga tangke de guerra kag mga salakyan. Kon kaisa, mabatyagan nila ang pagtay-og sang duta bangod sang mga bomba nga nagalupok malapit sa ila.

Sang Abril 2, 2022, nagahanda si Roman nga mag-deliver sang mga suplay para sa mga kauturan sa Kharkiv sang nagtupa ang madamo nga missile sa dalan. Nanago sia sa malapit nga bilding. Pagligad sang treinta minutos, nakita niya nga ang dalan nga iya tani agyan ginbombahan.

Si Volodymyr, nga isa sa boluntaryo nga drayber, nagsiling parte sa delikado nga sitwasyon: “Pirme kami nagapangamuyo kay Jehova nga hatagan kami sang kaalam para makahimo sang maalamon nga desisyon.”

Si Oleksandr kag ang iya asawa nga si Valentyna nagaistar sa Kharkiv upod sa tigulang nga mga ginikanan ni Oleksandr. Sa tion sang inaway, makita nila ang linupok sang bomba nga mga 100 metros lang ang kalayuon halin sa ila bintana. Bangod wala sila sing salakyan indi sila makapalagyo.

Nag-abot ang mga kauturan para i-rescue sila. “Nangamuyo kami kay Jehova kag nagpasalamat sa iya bangod sang mga kauturan nga nagbulig sa amon,” siling ni Oleksandr.

Si Vasyl, ang iya asawa nga si Natalia, kag ang ila tatlo ka bata nanago sing pila ka adlaw sa basement sang ila balay. Sang Pebrero 29, 2022, naglupok ang isa ka bomba malapit sa ila balay samtang nagapanago sila. Bangod sini naguba ang ila balay. Madumduman pa ni Vasyl ang matunog gid nga paglupok kag ang pagkapatay sang mga suga sa ila nga basement.

Sang nag-untat kadali ang inaway, nagsaylo ang iya pamilya sa basement sa kaingod nga bilding. Sang Marso 3, 2022, nakita sang mga kauturan ang pamilya ni Vasyl kag gindala sila sa mas safe nga lugar sa pungsod.

Amo sini ang ginsiling ni Vasyl sang gin-rescue sila pakadto sa mas safe nga lugar: “Nagapasalamat gid kami kay Jehova. Sa una nga tion sa sulod sang pila ka adlaw, nga sa pamatyag ko daw pila na ka semana, nakapanihapon na kami nga may kalinong, nga wala nagakabalaka nga basi may malain nga matabo sa amon kabataan.”

Si Oleksandr, nga isa sa mga drayber, nagsiling nga ang mga pag-rescue isa ka ebidensia sang paghiusa sang katawhan ni Jehova. “Nakabulig ini sa akon nga maintiendihan nga si Jehova nagaulikid gid sa iya katawhan,” siling niya. “Nalipay gid ako sang makita ko ang mapinasalamaton nga mga kauturan.”

Nagapasalamat gid kita bangod sa kaisog sang aton mga kauturan, kag ginapangamuyo gid naton nga pakamaayuhon sila ni Jehova sa ila ginpakita nga gugma kag kaisog.—Roma 12:10.