Pagkatapos sang apat ka tuig nga pagpakigbato sa mga kaso sa korte, ginpasugtan na ang mga Saksi ni Jehova sa banwa sang Tetiiv, Ukraine, nga gamiton para sa pagsimba ang ila Kingdom Hall. Sang Disiembre 2014 pa nahuman ini nga Kingdom Hall, pero sulitsulit nga nangita sing rason ang State Architect-Building Council (SABC) para indi ini magamit: anom ka beses nga wala maghatag sing occupancy permit, ginmultahan sing daku ang kongregasyon, kag ginkanselar pa gani ang building permit bisan pa nga human na ang Kingdom Hall.

Sang Oktubre 10, 2018, ang Supreme Court sang Ukraine nagsiling nga nasunod sang aton mga kauturan ang tanan nga kasuguan parte sa konstruksion. Nagsiling man ang korte nga base sa European Convention on Human Rights may kinamatarong ang bisan sin-o nga magpatindog sang bilding nga gamiton para sa pagsimba. Sang Marso 28, 2019, ginhatag sang bag-o gintangdo nga department chief sang SABC ang occupancy permit sa aton mga kauturan. Ginhiwat sang kongregasyon ang ila una nga miting sina mismo nga bulan.

Sang Nobiembre 2, 2019, gin-agda sang mga kauturan ang mga pumuluyo sa palibot nga magbisita sa Kingdom Hall. Indi lang ang ila mga kaingod ang nagkadto, kundi pati man ang mga opisyales sang banwa kag sang distrito. Si Anatoliy Fedorovych Zavalniuk, Chief Architect sang Tetiiv District State Administration, nagsiling: “Ginsunod gid ninyo ang kasuguan kag mga ginapatuman sang gobierno, pati ang mga plano nga gin-aprobahan sang Administrasyon. Nagnami pa gid ang banwa bangod sang inyo bilding nga ginagamit sa pagsimba. Salamat gid sa inyo ginhimo.”

Nagakalipay kita upod sa aton kauturan sa Tetiiv bangod sini nga kadalag-an. Nalipay gid kita nga magamit na nila ang ila Kingdom Hall sa pagdayaw kag paghimaya kay Jehova.—Salmo 69:30.