NOBIEMBRE 20, 2020
UKRAINE
Mga Desisyon sang ECHR nga Pabor sa mga Saksi ni Jehova sa Ukraine
Ginkondenar sang Korte ang Ukraine bangod wala sini ginsilutan ang mga naghimo sing krimen batok sa aton mga kauturan bangod sa dumot sa relihion
Sang Nobiembre 12, 2020, ang European Court of Human Rights (ECHR) nagpapanaug sang tatlo ka desisyon pabor sa mga Saksi ni Jehova. Ini nga mga kaso amo ang Zagubnya and Tabachkova v. Ukraine, Migoryanu and Others v. Ukraine, kag Kornilova v. Ukraine. Ginpasaka ini sa Korte sang 2014 kag 2015. Sa kada isa sini nga mga kaso, wala ginsilutan sang mga awtoridad ang mga tawo nga mapintas nga nag-atake sa mga Saksi ni Jehova. Gindeklarar sang ECHR nga wala ginproteksionan sang mga awtoridad sa Ukraine ang kinamatarong sang aton mga kauturan. Nagmando man ang Korte nga bayaran ang mga biktima sang 14,700 euros ($17,400 U.S.) bilang danyos.
Zagubnya and Tabachkova v. Ukraine: Sang Abril 20, 2009, si Sister Zagubnya kag si Sister Tabachkova nagapamalaybalay sa baryo sang Novi Mlyny. Sang nasugata sila sang pari sang Trinity Orthodox Church sa sina nga lugar, nga si Mykola Lysenko, ginbakol niya sang kahoy ining duha ka sister sa ila ulo kag likod. Wala gid nasilutan ang pari, bisan pa gin-ako niya nga gusto niya “pahugon” ang aton mga sister kag “pauntaton ang ila hilikuton.”
Migoryanu and Others v. Ukraine: Sang Abril 5, 2012, may 21 ka Saksi ni Jehova kag pila ka bisita nga nagtipon para selebrahon ang Memoryal sang kamatayon ni Jesucristo. May isa ka guban sang mga tawo nga ginapangunahan ni Orthodox Priest Mr. Greku, nga nagpanggamo sa miting. Ginbuyayaw kag ginpasipalahan sang guban ang mga tumalambong kag ginpahog nila pati ang mga bata kag ang may edad na nga mga babayi.
Padayon nga gin-atake sini nga pari kag sang iya mga kaupdanan ang mga Saksi ni Jehova. Ginkastigo nila ang mga brother, ginsunog ang salakyan sang isa ka brother, kag ginhabuyan sing handmade nga bomba ang isa ka balay samtang nagakatulog didto ang mga Saksi. Pagkatapos sining mapintas nga mga insidente, nagreport sa pulis ang mga biktima kag naghatag man sila sang mga ebidensia, pareho sang mga video nga ila nakuha. Pero indi mag-ugyon ang mga pulis nga ini nga mga krimen ginhimo bangod sa paghingabot sa relihion, kag suno sa ila indi maathag sa video kon sin-o ang mga naghimo sini. Gani, wala gid nasilutan ang pari kag ang iya mga kaupdanan.
Kornilova v. Ukraine: Sang Marso 7, 2013, sa banwa sang Nosivka, si Sister Kornilova kag si Sister Serdiuk nagapang-imbitar sa ila mga kaingod nga magtambong sa Memoryal sang kamatayon sang Cristo. May isa ka lalaki nga nagbuyayaw kag nag-insulto sa ila. Dayon, gin-atake niya sila kag ginsumbag niya sing todo sa guya si Sister Kornilova. Naggrabe gid si Sister Kornilova amo nga 11 ka adlaw sia sa ospital. Indi magpati ang mga pulis nga ang rason sini nga pag-atake amo ang paghingabot sa relihion kay siling nila ang aton sister biktima lang sang “personal nga kaakig.” Ginmultahan lang sang korte sing diutay nga kantidad ang nagpang-atake nga lalaki.
Halin sa wala pa tuo: Si Sister Tetyana Kornilova, si Sister Tetiana Zagubnya, si Sister Maria Tabachkova, kag si Brother Vasyl Migoryanu. Sila nga apat nalakip sa madamo nga mga Saksi ni Jehova nga nangin biktima sang mga krimen bangod sa dumot sa relihion nga natabo sa Ukraine halin sang 2009 asta sang 2013
Ang mga representante sang branch sa Ukraine madamo nga beses nga nakigkita sa lokal, nasyonal, kag internasyonal nga mga opisyales para istoryahan ang parte sa sini nga paghingabot. Sa tapos nila mahimo ang tanan nga posible nga solusyon, ang aton mga kauturan nagpasaka sang kaso sa ECHR sang 2014. Talalupangdon nga antes sina nga tuig, amat-amat na nga gindokumento sang mga opisyales ang paghingabot nga nagatabo sa Ukraine bangod sa relihion. Sang 2013, ang report sang Ombudsman sa Ukraine nagsiling: “Ang mga pulis wala sing insakto nga imbestigasyon sa sining mga krimen nga ginahimo bangod sa paghingabot sa relihion, gani nagapati ang mga kriminal nga puede lang nila nga padayunon ang pagpang-atake sa mga tawo.” Sa 2013 man nga report sini parte sa Ukraine, ang United Nations Human Rights Committee nagpahayag sang kabalaka sini kay ang mga krimen nga ginahimo bangod sa dumot, pati ang ginahimo batok sa mga Saksi ni Jehova, wala ginasilutan sing mabug-at sa Ukraine. Suno sa sini nga Committee, ang gobierno sang Ukraine dapat “magpanikasog gid sing tuman para siguraduhon nga ang mga krimen nga ginahimo bangod sa dumot maimbestigar sing maayo, makasuhan ang mga nanghalit . . . kag kon mapamatbatan nga guilty, silutan sang nagakadapat, kag bayaran sing nagakaigo nga danyos ang mga biktima.”
Sang nagligad nga mga tinuig, amat-amat na nga ginapanikasugan sang gobierno sang Ukraine nga mabag-o ang sitwasyon. Ang mga Saksi ni Jehova sa sini nga pungsod may kahilwayan sa relihion. Pero, nagalaum kita nga ang tatlo ka desisyon sang ECHR magapahulag sa mga ahensia sang gobierno sa Ukraine kag sa iban pa nga pungsod nga padayon nga proteksionan ang kahilwayan sa relihion sang aton mga kauturan. Ginahulat gid naton nga mag-abot ang tion nga tapuson ni Jehova ang tanan nga paghingabot sa iya mga sumilimba, bangod “matarong ang tanan niya nga ginahimo.”—Deuteronomio 32:4.
