Sang Pebrero 24, 2022, gin-atake sang Russia ang Ukraine. Masobra 129,000 ang Saksi ni Jehova sa Ukraine upod sa ila kabataan. Ang branch office nag-organisar sang 27 ka Disaster Relief Committee (DRC) para magbulig sa aton mga kauturan. Dugang pa, bilang pagpakita sang Cristianong gugma, nanikasog ang aton mga kauturan nga magbulig kag magpaumpaw sa kada isa kag sa ila mga kaingod sa sining tion sang krisis.

Bisan pa nga ang kalabanan nga kauturan nagpabilin sa pungsod, may pila nga nagdesisyon nga malagyo sa iban nga pungsod. Ang mga nalagyo nagpila sing tuman kalawig, ang iban sini mga 30 kilometros ang kalawigon, kag nagdugay ini sing tatlo ukon apat ka adlaw para makalab-ot sa customs. Ang mga Saksi sa lugar nga ginapilahan nagpangita sang ila mga kauturan nga nagapila kag ginahatagan sila sing makaon kag iban pa nga bulig. Sang nakatabok na ang mga kauturan sa pihak nga mga pungsod, may nagahulat na didto nga iban nga Saksi nga may ginauyatan nga mga sign nga jw.org para hatagan sila sing paumpaw kag bulig.

• Makapasubo nga sang Marso 1, 2022, 1 ka apa nga brother sa Kharkiv ang napatay kag ang iya asawa nasamaran sing malubha bangod sa pagpamomba

• 3 pa ka sister ang nasamaran

• Masobra 5,000 ka kauturan ang naghalin sa ila balay

• 2 ka balay ang nawasak

• 3 ka balay ang may daku nga guba

• 35 ka balay ang may gamay nga guba

• 2 ka Kingdom Hall ang naguba

• Madamo nga kauturan ang wala sing kuryente, heating, telepono, kag tubig

• 27 ka DRC ang ginporma sa Ukraine

• 867 ka kauturan ang ginbuligan sang DRC nga makakita sang dalayunan sa mas safe nga mga lugar

• Ang mga DRC nagaaman sing kinahanglanon nga mga suplay, pareho sang pagkaon kag tubig

Ini nga mga numero inisyal pa lang nga mga report.

Ginapangamuyo naton ang aton mga kauturan nga kabay nga may kaalam kag paghangop sila sa pag-atubang sining nagabag-obag-o kag mabudlay nga mga sitwasyon samtang ginapakita nila ang gugma sa isa kag isa.—Hulubaton 9:10; 1 Tesalonica 4:9.