OKTUBRE 25, 2023
UKRAINE
Pagdumdom sa Makasaysayan nga Bawtismo sa Ukraine 30 ka Tuig Na ang Nagligad
Sang Agosto 7, 1993, sa Kyiv, Ukraine, 7,402 ka kauturan ang nabawtismuhan sa “Divine Teaching” nga Internasyonal nga Kombension sang mga Saksi ni Jehova. Amo ini gihapon ang pinakadamo nga nabawtismuhan sa moderno nga kasaysayan sang katawhan ni Jehova. Nadumduman gihapon sang mga nabawtismuhan sina nga tion ining espesyal nga okasyon.
Nalakip sa mga nabawtismuhan si Volodymyr kag ang iya asawa, nga si Alla. Amo ini ang pinakauna nga kombension nga ila natambungan. Sang gindumdom nila ang halos 65,000 nga nag-attend halin sa 16 ka pungsod, nagsiling sila: “Ang kombension sa Kyiv nagpakita sa amon nga ang aton paghiliutod sa bilog nga kalibutan matuod gid kag indi lang basta mabasa namon sa mga publikasyon. Subong, samtang naga-attend kami sa mga kombension kada tuig, madamo pa kami sang nakilala nga may dalayawon nga mga halimbawa kon paano unahon ang espirituwal nga mga tulumuron kag mangin malipayon.”
Sa wala: Si Volodymyr kag ang iya asawa nga si Alla, nga nag-attend sa internasyonal nga kombension sang 1993. Sa tuo: Si Volodymyr kag si Alla subong
Si Oleksandr, nga isa ka brother halin sa Kyiv, nalakip sa sobra 50 ka kauturan halin sa ila kongregasyon nga nabawtismuhan sa sina nga kombension. Gindumdom niya ang natabo: “Nagtulo ang akon mga luha sang nakita ko ang gugma kag paghiusa didto. Nagkumbinsi ini sa akon nga bahin ako sang isa ka mahigugmaon nga espirituwal nga pamilya. Amo gihapon sini ang akon nabatyagan kada mag-attend ako sa mga kombension.”
Sa wala: Si Oleksandr nga nagapapiktyur sa internasyonal nga kombension sa Kyiv, Ukraine, sang 1993. Sa tuo: Si Oleksandr kag ang iya asawa nga si Larysa subong
Sang gindumdom ni Liudmyla ang adlaw sang iya bawtismo kag ang bilog nga kombension, sia nagsiling: “Ang programa sa kombension nagbulig sa akon nga magpokus sa akon espirituwal nga mga tulumuron. Ginhimo ko nga goal nga alagaron si Jehova sing bug-os tion. Nalab-ot ko ina nga goal, kag subong 28 ka tuig na ako nga ara sa bug-os tion nga pag-alagad. Halin sang una asta subong, pirme gid ako ginbuligan ni Jehova.”
Sa wala: Si Liudmyla sa 1993 nga “Divine Teaching” nga Internasyonal nga Kombension. Sa tuo: Si Liudmyla subong
Ang 1993 nga “Divine Teaching” nga Internasyonal nga Kombension sa Kyiv isa gid ka espesyal nga okasyon. Halin sina nga tion, nagdamo sing tatlo ka pilo ang mga manugbantala sa Ukraine. Subong, padayon nga ginapakamaayo ni Jehova ang mga taga-Ukraine nga maisog nga nagaalagad sa iya, naghimo sang personal nga dedikasyon, kag nagpabawtismo.—Exodo 32:26.