Paagi sa bulig ni Jehova, padayon nga ginabatas nanday Sister Liudmyla Mozul kag Sister Kateryna Rozdorska ang kasakit kag kasubo bangod sa inaway. Ang ila mga bana nga si Petro Mozul kag si Dmytro Rozdorskyi, amo ang una nga mga Saksi ni Jehova nga napatay bangod sa inaway sa Ukraine. Makapasubo nga asta sa sini nga report 34 na ka kauturan ang napatay bangod sa inaway.

Si Petro kag si Liudmyla nabawtismuhan sang 1994. Kuarentay tres ka tuig na sila nga mag-asawa.

“Kada adlaw, ginapabakod ako sang mga kauturan,” siling ni Liudmyla. “Ginatawgan gid nila ako pirme. Nakahibi man ako sang nakabaton ako sang makapaumpaw nga sulat halin sa Ukraine branch.”

Nagsugod ang inaway sang Pebrero 24, 2022. Si Petro, isa ka ministeryal nga alagad sa sign-language nga kongregasyon. Napatay sia sang sia kag ang iya pamilya nagpalagyo sa grabe nga pagpamomba sa Kharkiv sang Marso 1, 2022.

Sadto nga adlaw, pagkatapos sang pila ka adlaw nga pagpamomba, may mga fighter jet nga nag-atake sa siudad. Nagtipon sang pila ka mga kinahanglanon ang pamilya kag naghalin dayon pagkatapos sang 30 minutos. Si Petro kag si Liudmyla upuray sa isa ka salakyan. Ang ila bata nga si Oleksii, kag ang iya asawa nga si Maryna upuray man sa isa ka salakyan. “Nagadrayb kami sa dalan sa isa ka residential area sang gulpi lang nagpamomba ang mga fighter jet,” siling ni Liudmyla. “Nagatay-og ang amon salakyan bangod sang kabaskog sang pagsinigabong.”

Si Petro nga 67 anyos, naglikaw para indi niya mabungguan ang salakyan ni Oleksii, pero nakatigayon sia sang madamo nga pilas. Sia kag si Liudmyla gindala sa isa ka ospital pero napatay gid sang ulihi si Petro. Si Liudmyla naman madamo sing pilas sa iya nga tiil kag tiyan bangod sang mga shrapnel. Wala maano si Oleksii kag si Maryna. Nabal-an na lang ni Liudmyla nga patay na si Petro sang makagua sia sa ospital pagligad sang tatlo ka adlaw.

Si Liudmyla nagsiling: “Bangod ginapamensar ko pirme ang kaayo ni Jehova kag ang iya matahom nga katuyuan, mas nabatyagan ko ang kalinong. Sigurado ako nga sa bag-o nga kalibutan makita ko liwat ang akon bana, kag eksayted na ako nga maabot inang makalilipay nga tion.”

Si Dmytro kag si Kateryna, walo ka tuig na nga mag-asawa. Sang ara sia sa ulubrahan nagtawag sia sa iya asawa, kag ang katapusan niya nga ginhambal, “Mapuli na ’ko dugaydugay.”

Pagligad sang pila ka oras, sang Marso 8, 2022, ang isa ka upod sa obra ni Dmytro nagtawag kay Kateryna kag nagsiling nga nakatapak si Dmytro sang landmine kag gindala sa ospital. Naoperahan sia pero napatay sia pagligad sang lima ka oras.

Sang nabal-an ni Kateryna ang pagkapatay ni Dmytro, sia nagsiling: “Sina nga gab-i, wala lang gin-uyatan ni Jehova ang akon kamot, kundi ginkugos niya ako. Nabatyagan ko gid nga suod si Jehova sa akon.”

Si Dmytro nga 28 anyos, kag nabawtismuhan sang 2006, isa ka elder sa Donetsk Region sa Ukraine.

Pagkatapos sang diskurso sa lubong ni Dmytro, nagbiyahe si Kateryna sing 12 ka oras pakadto sa mas safe nga lugar sa Ukraine. “Ginpalig-on ako sang mga kauturan sa Ukraine kag sa iban pa nga pungsod. Nabatyagan ko gid ang ila nga pagpalangga, gani naghaganhagan ang akon nga kasubo.”

Nagsiling pa sia: “Naumpawan man ako paagi sa pag-preaching. . . . Kon ginabudlayan na gid ako gina-recite ko ang mga bersikulo sa Biblia pareho sang Filipos 4:6, 7.”

Sigurado kita nga si Jehova padayon nga magapabakod kag magapaumpaw sa aton pinalangga nga mga kauturan nga napatyan sang ila pinalangga bangod sa inaway sa Ukraine.—Salmo 61:1-3.