Ang aton mga kauturan sa siudad sang Mariupol, Kharkiv, Hostomel kag iban pa nagaatubang sang grabe nga kabudlayan bangod sa padayon nga pagpamomba sa Ukraine. Ang iban sa ila wala makahalin sa ila mga basement ukon ginapanaguan sa sulod sang mga isa ka semana. Diutay na lang ang ila pagkaon, kag mabudlay kontakon ini nga mga kauturan kay malaka na lang ang may kuryente, Internet, kag signal sa cellphone.

Nasubuan kita nga si Brother Dmytro Rozdorskyi, isa ka 28 anyos nga elder sa Myrnohrad, napatay bangod sa iya mga pilas sang nakatapak sia sang landmine. Nagapangamuyo kita para sa mga napatyan sang pinalangga kag para sa aton mga kauturan nga ara sa mga lugar nga apektado sang grabe nga pagpamomba.—2 Tesalonica 3:1.

Ang masunod amo ang report halin sa Ukraine nga natipon asta sang Marso 7, 2022:

• 2 ka kauturan ang napatay

• 8 ka kauturan ang nasamaran

• 20,617 ka kauturan ang nagbakwit pakadto sa mas safe nga mga lugar sa pungsod

• 25 ka balay ang nawasak

• 29 ka balay ang may daku nga guba

• 173 ka balay ang may gamay nga guba

• 5 ka Kingdom Hall ang naguba

• 27 ka Disaster Relief Committee (DRC) ang nagapanghikot sa Ukraine

• 6,548 ka kauturan ang direkta nga ginbuligan sang mga DRC para makakita sang safe nga dalayunan

• 7,008 ka kauturan ang nagpalagyo pakadto sa iban nga pungsod kag ginabuligan subong sang ila Cristianong mga kauturan sa sina nga mga pungsod

• 1 ka Assembly Hall kag mga 30 ka Kingdom Hall sa western Ukraine, pareho sa ara sa mga rehiyon sang Chernevtsi, Ivano-Frankivsk, Lviv, kag Transcarpathian ang ginhanda para dayunan sang mga refugee