Wala nagauntat ang pagsuporta sang mga kauturan sa isa kag isa sa Ukraine. Padayon sila nga nagapakita sang gugma bisan pa mabutang sila sa peligro.

Sang Hunyo 6, naglupok ang isa ka missile malapit sa balay sang 81 anyos nga si Sister Olena. Nagresulta ini sa buho nga pito ka metro ang kadalumon kag nawasak ang balay sang iya kaingod. Mabaskog gid ang paglupok amo nga naguba man ang balay ni Sister Olena.

Sia nagsiling: “Nagatulog ako, kag may natumba nga dingding malapit sa akon ulo. Napuno sang madamol nga yab-ok ang palibot. Naglinapta ang mga kristal kag mga bato. Nagapasalamat ako kay Jehova nga buhi pa ako.” Ang mga kauturan sa ila lugar nagkadto dayon kay Sister Olena pila ka minutos lang matapos ang paglupok. Nagkadto man ang isa ka brother bisan pa nga ang iya balay naguba man. Si Sister Olena nagsiling pa: “Sang nag-abot ang mga kauturan, daw indi sila kabalo kon ano ang ila isiling bangod sa ila nakita. Napalig-on ako nga nagkadto sila. Nalipay gid ako nga may kaupod ako.”

Si Serhii, isa ka elder nga pirme nagabisita kay Sister Olena upod sa mga pamatan-on sa kongregasyon, nagsiling: “Sang nabalitaan ko ang paglupok malapit sa balay ni Sister Olena, hinadlukan gid ako kag nabalaka. Sang nakita ko nga wala sia sang grabe nga samad kundi pila lang ka lagob, naumpawan gid ako. Pero dayaw gid ako kay ang una nga butang nga ginpangita ni Sister Olena sang naguba ang iya balay amo ang literatura sa Biblia nga nabaton niya pila ka adlaw lang ang nagligad.”

Makalilipay nga nakakita sang bag-o nga balay para sa iya ang iya mga paryente. Padayon nga nagahatag sang praktikal nga bulig ang kongregasyon, kag ginakontak sang mga elder si Sister Olena kada adlaw. Ginhatagan sia sang mga kauturan sang hearing aid para makabenepisyo sia sa mga miting sang kongregasyon. Sia nagsiling: “Kon kaisa daw nagapalangluya na ako, pero nagabakod ako bangod sa mga miting. Pirme ako ginatawgan sang mga kauturan, gani nalipay gid ako.”

Gin-istorya sang isa ka mag-asawa ang ila eksperiensia sang nagpanago sila sa basement sang isa ka Kingdom Hall upod sa 200 ka kauturan. Ang asawa nagsulat: “Nagdayaw gid ako sa pag-atipan sang mga elder. Bangod sa ila nadumduman ko si David, nga handa nga mapatay sang nagpakig-away sia sa leon kag oso para luwason ang mga karnero. Ang mga elder sa basement nagrisgo sang ila kabuhi para makakuha sang pagkaon kag tubig, kag sang gas para may suga kami. Nagapasalamat gid kami kay bangod sina, makahiwat kami sang miting sa kongregasyon kag miting sa pagbantala. Bisan pa madamo nga bomba ang nagatupa, regular nga ginabisitahan sang mga elder ang mga kauturan nga nagpabilin sa ila balay. Ginadalhan nila sila sang pagkaon kag tubig kag ginapaumpawan sila. Mas nga ginrespeto ko pa gid ini nga mga elder. Antes sini nga mga hitabo, para sa akon mga manunudlo sila kag mga manugbantala, pero subong nabatyagan ko nga masaligan gid sila nga mga manugbantay. Nagapasalamat gid ako sa ila halimbawa sang kaisog, pag-atipan, kag pagkamasaligan!”

Ang mga kauturan sa isa ka kongregasyon sa Ukraine nagsulat sa branch sa Ukraine parte sa mga nagapanguna sa pagbulig: “Tinagipusuon gid kami nga nagapasalamat. Nagadayaw kami kon paano kami ginaatipan ni Jehova paagi sa aton mga kauturan. Naeksperiensiahan gid namon ang ginsiling ni Jesus: ‘Paagi sini mahibaluan sang tanan nga mga disipulo ko kamo, kon nagahigugmaanay kamo.’”—Juan 13:35.

Ang masunod amo ang report halin sa Ukraine nga natipon asta sang Hunyo 21, 2022. Ini nga mga numero base sa kompirmado nga mga report sang mga kauturan. Pero mahimo nga indi lang amo sini ang aktual nga mga report bangod indi pirme makontak ang tanan nga rehiyon sa pungsod.

• 42 ka kauturan ang napatay

• 83 ka kauturan ang nasamaran

• 31,185 ka kauturan ang nagbakwit

• 495 ka balay ang nawasak

• 557 ka balay ang may daku nga guba

• 1,429 ka balay ang may gamay nga guba

• 5 ka Kingdom Hall ang nawasak

• 8 ka Kingdom Hall ang may daku nga guba

• 34 ka Kingdom Hall ang may gamay nga guba

• 27 ka Disaster Relief Committee (DRC) ang nagapanghikot sa Ukraine

• 52,348 ka kauturan ang direkta nga ginbuligan sang DRC para makakita sang safe nga dalayunan

• 23,433 ka kauturan ang nagpalagyo pakadto sa iban nga pungsod kag ginabuligan subong sang ila Cristianong mga kauturan sa sina nga mga pungsod