Nalipay gid ang mga kauturan sa bilog nga Ukraine kay puede na sila liwat makabantala sa publiko kag madamo sila sing maayo nga eksperiensia. Nagreport ang mga manugtatap sang sirkito kag mga elder nga nanamian gid ang mga tawo kay nakita na nila liwat ang mga literature cart kag nagsiling pa ang iban nga nahidlaw sila sa mga Saksi ni Jehova nga naga-preaching sa ila lugar.

Si Tatiana sa kongregasyon sang Serhiivka sa Odesa Region, nagkadto sa iya mga return visit nga nakontak niya antes pa sang pandemic. Sia nagsiling, “Halin sa umpisa, nakita ko ang pagpakamaayo ni Jehova sa amon pagtinguha nga magbalik sa pagministeryo sa publiko.” Isa ka bes, ginduaw niya ang isa ka babayi nga wala magpa-Bible study antes sang pandemic. Pag-abot niya, eksayted ang babayi nga istoryahan ang mga topiko sa Biblia kag nagsugot na sia nga magpa-Bible study. Si Tatiana nagsiling pa, “Dapat ko kadtuan ang tanan ko nga return visit sadto kag tanyagan ang kada isa sa ila sang Bible study!”

Si Yevheniy kag si Lilia mga manugbantala nga nagbakwit halin sa Mariupol. Ginbiyaan nila ang ila balay kag subong nagaistar sila sa mas safe nga lugar sa Ukraine. Regular sila nga nagapakigbahin sa pagbantala. Suno sa ila, ang ministeryo nakabulig sa ila nga indi magpokus sa ila lang mga problema. Nagsiling sila: “Nagbag-o gid ang amon kabuhi kag kabudlay mag-umpisa liwat. Pero ginadumdom namon nga ginabuligan gid ni Jehova ang iya mga alagad. Ginabuligan kami sang iya balaan nga espiritu kag sang mga kauturan nga makasugod sang bag-o nga kabuhi sa bag-o nga lugar.”

Sa iban nga lugar sang pungsod, nagapanaksi man ang aton mga kauturan paagi sa ila maayo nga hinimuan. Halimbawa, ang isa ka grupo sang mga kauturan sa siudad sang Mykolaiv nagbulig sa isa ka international humanitarian relief organization nga kay-uhon kag iplastar sing maayo ang unod sang isa ka warehouse nga ginagamit sa pagbulig sa mga sibilyan. Ginkay-o sang mga kauturan ang linya sang tubig, naghimo sila sang mga estante, kag ginpainpain nila ang pila ka tonelada nga suplay. Sang gin-inspeksion ini sang isa ka representante sang humanitarian organization, nakahibi gid sia. Sia nagsiling, “Wala gid ako maglaum nga amo sini kanami ang mahimo ninyo.”

Bisan pa nagaatubang sing kabudlayan subong ang aton mga kauturan sa Ukraine, nakabatyag sila sang kalipay bangod sa ila aktibo nga pagpakigbahin sa ministeryo kag “paghimo sing maayo.”—Galacia 6:9.

Ang masunod amo ang report halin sa Ukraine nga natipon asta sang Hulyo 13, 2022. Ini nga mga numero base sa kompirmado nga mga report sang mga kauturan. Pero mahimo nga indi lang amo sini ang aktual nga mga report bangod indi pirme makontak ang tanan nga rehiyon sa pungsod.

• 42 ka kauturan ang napatay

• 97 ka kauturan ang nasamaran

• 28,683 ka kauturan ang nagbakwit

• 524 ka balay ang nawasak

• 588 ka balay ang may daku nga guba

• 1,554 ka balay ang may gamay nga guba

• 5 ka Kingdom Hall ang nawasak

• 10 ka Kingdom Hall ang may daku nga guba

• 36 ka Kingdom Hall ang may gamay nga guba

• 27 ka Disaster Relief Committee (DRC) ang nagapanghikot sa Ukraine

• 52,947 ka kauturan ang direkta nga ginbuligan sang DRC para makakita sang safe nga dalayunan

• 23,863 ka kauturan ang nagpalagyo pakadto sa iban nga pungsod kag ginabuligan subong sang ila Cristianong mga kauturan sa sina nga mga pungsod