Halin sang Hulyo 23 asta 31, may mga manugbantala sa bug-os nga Ukraine kag sa iban nga pungsod nga ila gindangpan nga ginbawtismuhan sa 2022 nga ‘Tinguhai ang Paghidait’! nga Kombension. Suno sa report asta sang Agosto 2, may 1,113 nga nabawtismuhan sa Ukraine. Ang isa ka brother sa Ukraine nagsiling: “Indi mapauntat bisan sang inaway ang paghimo sang disipulo nga hilikuton. Ginapakita sini nga gintuman gid ni Jesus ang iya ginpromisa nga: ‘Kaupod ninyo ako sa tanan nga tion.’”—Mateo 28:20.

Nalipay kami nga i-report ang masunod nga mga eksperiensia.

Si Natalia, nga halin sa Kreminna, Luhansk Region, nagaedad sing 63 anyos. Sia kag ang iya duha ka bata nga babayi nagtuon upod sa mga Saksi ni Jehova sang dekada ’90. Ang iya mga bata nag-uswag kag sang ulihi nagpabawtismo, pero sia wala. Sang nagsugod ang inaway, gindala si Natalia sang isa ka pamilya sang mga Saksi ni Jehova sa mas safe nga lugar. Ginpatener sia sa isa ka Kingdom Hall sa Ivano-Frankivsk.

Si Natalia nagsiling: “Pagkatapos sang grabe nga binombahanay, daw nalipatan ko na kon paano magyuhum. Pero ginpakitaan gid ako sang matuod nga gugma sang mga kauturan. Wala ko gid ginpaabot nga atipanon nila ako. Sina nga tion, napukaw ang akon gugma kay Jehova. Pirme ko na ginabasa ang Biblia, kag gin-agda ako sang isa ka sister nga mag-Bible study gamit ang Magkabuhi sing Wala Katapusan! nga libro. Regalo gid sia ni Jehova sa akon.” Nagsiling pa si Natalia: “Subong, malipayon gid ako nga isa na ako ka bawtismado nga Saksi ni Jehova. Gusto ko gid tumanon ang pinakadaku nga sugo: nga higugmaon si Jehova nga akon Dios sa ‘akon bug-os nga tagipusuon kag sa akon bug-os nga kalag kag sa akon bug-os nga hunahuna.’”—Mateo 22:37.

Si Olia nga halin sa Cherkasy, isa ka unbaptized publisher sang nagsugod ang inaway. Sang Marso 6, nalagyo sia pakadto sa Poland upod ang iya bata nga babayi kag apo nga babayi. Nagsiling sia: “Nag-abot kami didto nga go bag lang ang dala, pero gin-atipan gid kami nga tatlo sang akon mga kauturan. Tanan ini nagkumbinsi sa akon nga ang organisasyon ni Jehova nahiusa gid kag ginagiyahan sang iya espiritu. Bangod sini nga eksperiensia, nangin determinado pa gid ako nga idedikar kay Jehova ang akon kabuhi. Ginbuligan niya ako sa pinakamabudlay nga tion, kag subong gusto ko sia alagaron kag ipakita ang akon pagpasalamat.”

Si Yulia, nga halin sa Donetsk Region, 18 anyos. Nagdaku sia nga Saksi ang iya pamilya pero wala sia nag-uswag padulong sa bawtismo. Ginsugid niya ang iya eksperiensia nga natabo wala lang dugay nga nagsugod ang inaway. Nagsiling sia: “Nagahigda ako sa salog, kag narealisar ko nga puede ako mapatay bisan ano nga oras. Naguba gid ang bilog nga kalye nga ginaistaran sang akon pamilya kag wala gid sang nabilin, pero nakalampuwas kami. Sang maagyan ko ini, nagpangamuyo ako kag ginpamalandungan ang mga kinaiya ni Jehova. Bangod sini nabatyagan ko nga nangin mas malapit ako sa iya kag wala na ako nagduhaduha kon bala idedikar ko ang akon kabuhi kay Jehova ukon indi. Paagi sa pagsabat sa akon mga pangamuyo, ginpakita gid ni Jehova nga malapit sia sa akon. Sadto, may nabal-an lang ako parte sa Dios, pero subong palangga ko na sia.” Nabawtismuhan si Yulia sang Hulyo 23.

Sang nagsugod ang inaway, ang 11 anyos nga si David kag ang iya pamilya nagsaylo sa Germany. Isa na sia ka unbaptized publisher halin sang siam ka tuig pa lang sia. Gusto gid niya nga malab-ot ang iban pa niya nga goal sa pag-alagad kay Jehova. Nagsiling sia: “Nagdesisyon ako nga magpabawtismo kay palangga ko si Jehova kag gusto ko mangin abyan niya. Sang ginbawtismuhan ako, nakahibi ako sa kalipay kay bahin na ako sang dalayawon nga pamilya ni Jehova. Nanamian ’ko magsugid sa iban sang parte kay Jehova kag sang iya katuyuan para sa mga tawo, gani ang sunod ko nga goal amo ang magpayunir. Gusto ko man nga buligan ang mga kauturan sa kongregasyon, gani gusto ko nga sa pila ka adlaw mangin ministeryal nga alagad ako. Pero ang handum ko gid amo nga mangin Bethelite. Goal ko na ini sugod sang nagbisita ako sa branch office sa Lviv sang 2018.”

Si Olena nga halin sa Kyiv nangin unbaptized publisher sang 2011. Nangin inactive sia sing pulo ka tuig. Sang 2020, ginkontak sia sang mga elder kag ginhatagan sang brosyur nga Magbalik kay Jehova. Sia nagsiling: “Nag-Bible study ako liwat kag nagsugod sa pag-attend sa mga miting. Pero, nauntat ini liwat. Sang tion sang inaway, ginsabat ni Jehova ang akon mga pangamuyo, kag narealisar ko nga gin-amligan ako ni Jehova, ginpakitaan sang iya gugma, kag ginhatagan sang kalinong. Nagsaylo ako sa Romania kag nangita ako sang mga Saksi. Ang gugma kag pag-atipan sang mga kauturan daw pareho sang habol nga ginkunop ni Jehova sa akon.” Nabawtismuhan si Olena sang Hulyo 24. Nagsiling pa sia: “Nagapasalamat gid ako kay Jehova nga malawig katama ang pasensia niya sa akon. Nabal-an ko na gid subong nga “sa tanan nga butang may kusog ako paagi sa isa nga nagapabakod sa akon.”—Filipos 4:13.

Ang masunod amo ang report halin sa Ukraine nga natipon asta sang Agosto 2, 2022. Ini nga mga numero base sa kompirmado nga mga report sang mga kauturan. Pero mahimo nga indi lang amo sini ang aktual nga mga report bangod indi pirme makontak ang tanan nga rehiyon sa pungsod.

• 43 ka kauturan ang napatay

• 97 ka kauturan ang nasamaran

• 22,568 ka kauturan ang nagbakwit

• 586 ka balay ang nawasak

• 613 ka balay ang may daku nga guba

• 1,632 ka balay ang may gamay nga guba

• 5 ka Kingdom Hall ang nawasak

• 10 ka Kingdom Hall ang may daku nga guba

• 37 ka Kingdom Hall ang may gamay nga guba

• 27 ka Disaster Relief Committee (DRC) ang nagapanghikot sa Ukraine

• 53,836 ka kauturan ang direkta nga ginbuligan sang DRC para makakita sang safe nga dalayunan

• 24,867 ka kauturan ang nagpalagyo pakadto sa iban nga pungsod kag ginabuligan subong sang ila Cristianong mga kauturan sa sina nga mga pungsod