Madamo nga dalan, taytay, kag mga power station ang naguba ukon nahalitan gid sa pila ka lugar sang Ukraine bangod sa sigesige nga pagpamomba. Pero, wala mag-untat sa pag-attend sa mga miting sa kongregasyon kag pagpartisipar sa iban pa nga teokratiko nga mga hilikuton ang aton mga kauturan bisan masami nga wala sing kuryente.

Si Anastasia kag si Debora, nga mga payunir sa Kyiv, nagsiling nga kada adlaw mga 12 ka oras nga wala sila sing kuryente. Gina-charge nila ang ila mga gadyet kon may kuryente kag nagagamit sila sang cellular data para maka-attend sa miting. Pirme nagakadula ang Internet connection kon matapos na ang miting.

Ang isa pa ka kabudlayan kon wala sang kuryente amo ang katugnaw. Kon kis-a, nagagamit ang pila ka kauturan sang generator para mapaandar nila ang ila heater. Ang iban naman nagsaylo sa ila mga paryente nga may heater sa ila balay. Pero may mga kauturan nga ginaagwanta na lang ang katugnaw. Maayo na lang kay madamo nga balay ukon apartment sang kauturan ang may heater nga ginapaandar paagi sa gas, amo nga may heater sila bisan wala sing kuryente.

Si Iryna, isa ka payunir sa Ivano-Frankivsk, positibo gihapon. “Nagdesisyon ako nga indi pagpensaron ang mga butang nga indi ko makontrol,” siling niya. “Gani, nagapokus lang ako sa puede ko himuon sa isa ka oras. Ginapensar ko kon ano ang puede ko mahimo kon wala sing kuryente kag ginasigurado ko nga na-download ko na ang kinahanglan ko nga mga publikasyon.”

Bisan pa sang madamo nga mga kabudlayan, masako gihapon ang aton mga kauturan sa Ukraine sa pag-alagad kay Jehova. Nagasalig kita nga padayon niya nga pakamaayuhon ang ila pagtinguha sa “paghimo sing maayo.”—Galacia 6:9.

Ang masunod amo ang report halin sa Ukraine nga natipon asta sang Disiembre 6, 2022. Ini nga mga numero base sa kompirmado nga mga report sang mga kauturan. Pero mahimo nga indi lang amo sini ang aktual nga mga report bangod indi pirme makontak ang tanan nga rehiyon sa pungsod.

• 47 ka kauturan ang napatay

• 97 ka kauturan ang nasamaran

• 11,537 ka kauturan ang nagbakwit

• 590 ka balay ang nawasak

• 645 ka balay ang may daku nga guba

• 1,722 ka balay ang may gamay nga guba

• 7 ka Kingdom Hall ang nawasak

• 19 ka Kingdom Hall ang may daku nga guba

• 68 ka Kingdom Hall ang may gamay nga guba

• 27 ka Disaster Relief Committee (DRC) ang nagapanghikot sa Ukraine

• 54,212 ka kauturan ang direkta nga ginbuligan sang DRC para makakita sang safe nga dalayunan

• 26,811 ka kauturan ang nagpalagyo pakadto sa iban nga pungsod kag ginabuligan subong sang ila Cristianong mga kauturan sa sina nga mga pungsod