Mga 3,000 ka balay sang mga Saksi ni Jehova ang naguba ukon nawasak halin sang nagsugod ang inaway sa Ukraine sang Pebrero 2022. Sang Agosto, sa pagdumala sang Disaster Relief Department (DRD) kag sang Local Design/Construction Department, ginsugdan sang mga kauturan sa Ukraine ang pagpangay-o sang mga balay sa mga lugar nga safe na. Nagalakip ini sa pag-ilis sang naguba nga mga atop kag bintana kag iban pa nga gamay nga mga guba. Kon kis-a, kon nawasak gid ang balay, ang garahe ukon ang shed puede mahimo nga gamay nga balay. Subong, 37 na ka proyekto sa konstruksion ang natapos, kag 48 ang padayon nga ginaobra.

Mabudlay gid himuon ang pagpangay-o sa sining magamo nga tion. Pero wala ini nagpugong sa mga kauturan para magbulig sa pagpangay-o. Si Sister Svitlana, nga 70 anyos, halin sa Velyka Dymerka, Kyiv Region, nagsiling: “Wala ako sing kuarta para ipakay-o ang atop kag ang prante sang akon balay. Pero gin-surprise gid ako ni Jehova. Nagkadto ang mga kauturan kag ginkay-o nila ang akon balay sa sulod lang sang tatlo ka adlaw.”

Si Sister Nadiia nga taga-Horenka, Kyiv Region, nagsiling nga ang relief work nakabulig sa ila pagbantala. Sia nagsiling: “Ang pagpangay-o nangin daku gid nga panaksi sa tanan. Bisan ang mga tawo nga indi ko kilala nagaistorya parte sa matuod nga gugma nga ila nakita sa mga Saksi ni Jehova. Daw indi sila makapati nga nagkadto ang akon mga kauturan para buligan ako.”

Bisan ang mga nagub-an man sang balay nagabulig gihapon, pareho kay Yevhen kag kay Tetiana. Naguba ang balay sini nga mag-asawa sang naigo ini sang missile. Pero imbes nga magpokus sa nadula sa ila, nangin masako sila sa pagbulig sa ila mga kauturan. “Gusto gid namon nga makabulig sa iban,” siling ni Yevhen. “Paagi sa sini maatubang man namon ang amon mga kabudlayan.”

Amo man sina ang natabo kay Lidiia nga isa ka sister nga taga-Hostomel, Kyiv Region. Sang makay-o sang mga kauturan ang iya balay, nagboluntaryo man sia para makabulig sa iban. “Sa sulod sang duha ka semana, 16 ka kauturan ang nagbuligay para makay-o ang akon balay,” siling niya. “Pamatyag ko ara na ako sa bag-o nga kalibutan. Gani, gusto ko man buligan ang iban.”

Sining karon lang, ginbisitahan sang isa ka miembro sang Branch Committee sa Ukraine ang mga lugar diin padayon nga ginahimo ang relief work para palig-unon ang mga kauturan nga nadulaan sang balay. Nagsiling sia: “Halin sang una, ang mga kauturan sa Ukraine dalayawon gid sa ila ginapakita nga gugma sa isa kag isa. Pero, bangod sini nga inaway, mas nagsuod pa gid kami. Makapalig-on gid nga bangod sang bulig nga nabaton sang aton pinalangga nga mga kauturan, nangin mas mapisan pa gid sila sa ministeryo kag ‘nangin bugana sa madamo nga pagpasalamat sa Dios,’ suno sa ginsiling sang 2 Corinto 9:12.”

Ang masunod amo ang report halin sa Ukraine nga natipon asta sang Disiembre 20, 2022. Ini nga mga numero base sa kompirmado nga mga report sang mga kauturan. Pero mahimo nga indi lang amo sini ang aktual nga mga report bangod indi pirme makontak ang tanan nga rehiyon sa pungsod.

• 47 ka kauturan ang napatay

• 97 ka kauturan ang nasamaran

• 11,477 ka kauturan ang nagbakwit

• 590 ka balay ang nawasak

• 645 ka balay ang may daku nga guba

• 1,722 ka balay ang may gamay nga guba

• 7 ka Kingdom Hall ang nawasak

• 19 ka Kingdom Hall ang may daku nga guba

• 68 ka Kingdom Hall ang may gamay nga guba

• 26 ka Disaster Relief Committee (DRC) ang nagapanghikot sa Ukraine

• 54,212 ka kauturan ang direkta nga ginbuligan sang DRC para makakita sang safe nga dalayunan

• 26,892 ka kauturan ang nagpalagyo pakadto sa iban nga pungsod kag ginabuligan subong sang ila Cristianong mga kauturan sa sina nga mga pungsod