Halin sang Disiembre 26, 2022, ang mga regular kag espesyal payunir sa Ukraine nakaeskwela sa Pioneer Service School sa mga lugar nga safe na ang paghimo sini. Depende sa sitwasyon, ang mga payunir puede makaeskwela sing face-to-face ukon paagi sa Zoom. Bisan pa sang mga kabudlayan, pareho sang mga pagpamomba, blackout, kapigaduhon, kag indi sigesige nga Internet ginatinguhaan gid sang aton mga kauturan nga unahon ang pag-attend sa sining espesyal nga klase. Bilang resulta, nagdugang pa gid ang ila gugma kay Jehova kag nagbakod pa gid ang ila pagtuo.

Si Natalia halin sa Kryvyi Rih nagsiling: “Ang eskwelahan daw pareho sang salbabida para sa akon. Nabuligan ako sini nga indi malumos sa akon mga kabalaka kag kahadlok.” Si Anastasia halin sa Chernivtsi nagsiling man: “Sa sini nga eskwelahan, nabatyagan ko gid nga palangga ako ni Jehova. Grabe gid ang natabo sang nagligad nga tuig, pero ini nga eskwelahan amo gid ang kinahanglan ko. Napalig-on ako sini nga himuon ang tanan para mabaton ang pagpakamaayo ni Jehova.”

Si Svitlana, nga isa ka payunir halin sa Kitsman, daw nagaduhaduha nga mag-eskwela sang nabaton niya ang iya imbitasyon. Nagsiling sia: “Ginsugid ko kay Jehova ang akon ginakabalak-an, pati na ang kapigaduhon. Nagsalig ako sa iya kag wala gid ako naghinulsol. Nabatyagan ko gid ang pagpalangga kag pag-atipan ni Jehova.” Ang bana ni Svitlana nga indi Saksi ni Jehova, napalig-on man sa pagpanikasog sang iya asawa. Naga-attend naman sia sa mga miting sa kongregasyon upod kay Svitlana.

Duha ka beses nga kinahanglan magsaylo sang mga estudyante sa Zhytomyr sa isa ka underground shelter bangod sang mga warning nga may mamomba. Para makapainit-init sila, stove lang nga kahoy ang gatong ang ila ginagamit, kag ginpadayon lang nila ang klase. Bisan pa sini nga kabudlayan, si Valentyna, nga bag-o lang nagsaylo sa Zhytomyr, nagsiling: “Indi ko gid malipatan ini nga eskwelahan. Pamatyag ko daw ara ako sa idalom sang gamhanan nga mga pakpak ni Jehova.”

Pareho sa iban nga mga pungsod, ang mga payunir sa Ukraine nalipay gid sang nabal-an nila nga ginbuhinan ang lalab-uton nga oras. Sa tapos mabatian ini nga pahibalo, si Yulia nagsiling: “Nagdugang pa gid ang akon pagpalangga kay Jehova. Kay kaina sang aga, nagpangamuyo ako kay Jehova kag nakitluoy nga tugutan ako nga indi mag-untat sa pagpayunir. Wala ’ko kabalo kon paano niya ini sabton, pero nabal-an ko nga sabton gid niya ini. Sang nabal-an ko ang parte sa pagbuhin sa lalab-uton nga oras, gin-apresyar ko pa gid ang mga ginahimo ni Jehova para sa akon. Ining pinakabag-o nga balita daw pareho sang manamit nga dessert sa tapos sang amon pag-eskwela.”

Ang masunod amo ang report halin sa Ukraine nga natipon asta sang Enero 24, 2023. Ini nga mga numero base sa kompirmado nga mga report sang mga kauturan. Pero mahimo nga indi lang amo sini ang aktual nga mga report bangod indi pirme makontak ang tanan nga rehiyon sa pungsod.

• 47 ka kauturan ang napatay

• 97 ka kauturan ang nasamaran

• 8,953 ka kauturan ang nagbakwit

• 590 ka balay ang nawasak

• 645 ka balay ang may daku nga guba

• 1,722 ka balay ang may gamay nga guba

• 8 ka Kingdom Hall ang nawasak

• 17 ka Kingdom Hall ang may daku nga guba

• 76 ka Kingdom Hall ang may gamay nga guba

• 26 ka Disaster Relief Committee (DRC) ang nagapanghikot sa Ukraine

• 46 ka balay ang ginkay-o

• 5 ka Kingdom Hall ang ginkay-o

• 54,445 ka kauturan ang direkta nga ginbuligan sang DRC para makakita sang safe nga dalayunan

• 27,655 ka kauturan ang nagpalagyo pakadto sa iban nga pungsod kag ginabuligan subong sang ila Cristianong mga kauturan sa sina nga mga pungsod