Padayon naton nga ginapangamuyo ang aton mga kauturan sa Mariupol, diin padayon ang grabe nga inaway kag binombahanay. Makapasubo nga anom naton ka kauturan ang napatay bangod sa pagpamomba. Napulo na tanan ka kauturan naton ang napatay sa Ukraine. Kag suno sa ginbalita, ang isa ka sinehan diin nagapanago ang sobra 1,000 ka tawo ginbombahan sang nagligad nga semana. Wala sing napatay nga kauturan naton sa sini nga sinehan, pero may pila nga nasamaran.

Mga 750 ka kauturan naton ang nakapalagyo sa Mariupol, pero may mga 1600 pa nga wala makapalagyo. Madamo sa ila ang ara sa sidlangan sang siudad, nga kontrolado na subong sang Russia.

Suno sa report sang nagligad, mga 200 ka kauturan ang nagapanago sa basement sang isa ka propiedad nga may Kingdom Hall kag Assembly Hall. Sang nakakontak sing makadali ang mga kauturan didto sa basement, amo sini ang ila report:

“Sang nagabinombahanay na, madamo nga kauturan ang ginnerbios gid. Ang pila naghinibi na. Sang mabatian namon ang mga sinigabong sa gua, abi namon mapatay na kami sa bomba ukon sa sunog. May isa ka elder nga nagsiling nga makanta kami sang mga Kingdom song. Ang nakanta namon mga 10 asta 15 ka Kingdom song. Kon magtudo gani ang sinigabong kag kon magkusog ang tay-ug sang bilding, nagatudo man ang amon tingog. Dayon, ginbasa namon kag ginbinagbinag ang Salmo 27. Pagkatapos sini, nagsinugiray na ang kada isa sang ila paborito nga mga teksto halin sa Biblia kag kon paano ini nagpabakod sa ila. . . . Naeksperiensiahan namon nga si Jehova matuod gid nga ‘Amay nga may mapinalanggaon nga kaluoy kag Dios nga nagahatag sang tanan nga sahi sang lugpay,’ nga makapakalma sa amon sa sining pinakamabudlay gid nga mga tinion.”—2 Corinto 1:3, 4.

Nagasakripisyo gid ang mga elder kag ang mga miembro sang Disaster Relief Committee (DRC). Ginarisgo nila ang ila kabuhi sa pagpangita sa mga kauturan para madal-an sila sing mga pagkaon kag bulong kon kinahanglan. Kon kis-a, ini nga mga brother kinahanglan magkamang para indi sila maigo sang bala samtang ginapangita nila ang mga kauturan sa siudad. Proud gid kita sa aton mga brother nga “nagbutang sang ila kabuhi sa katalagman” para sa ila kauturan.—Roma 16:4.

Bangod wala sing gasul kag kuryente, ang maisog nga mga sister nagaluto sang pagkaon sa gua nga kahoy ang ginagatong sa ila ginaluto. Ginadul-ungan sing pagkaon ang mga tigulang kag ang dis-ebol nga mga kauturan. Madamo nga kauturan ang nadulaan sing puluy-an, salakyan, kag mga pagkabutang, pero nagapasalamat gid sila sa pag-atipan sang ila mga kauturan.

Ang ara sa mga palanaguan nagatinguha nga simbahon si Jehova sing regular paagi sa pagtuon sang Biblia sing tingob kag pagsugid sa iban sang mensahe sang Biblia kon may kahigayunan.

Ang masunod amo ang report halin sa Ukraine nga natipon asta sang Marso 22, 2022. Ini nga mga numero base sa kompirmado nga mga report sang mga kauturan. Pero mahimo nga indi lang amo sini ang aktual nga report bangod indi pirme makontak ang tanan nga rehiyon sa pungsod.

• 10 ka kauturan ang napatay

• 27 ka kauturan ang nasamaran

• 33,180 ka kauturan ang nagbakwit pakadto sa mas safe nga mga lugar sa pungsod

• 78 ka balay ang nawasak

• 102 ka balay ang may daku nga guba

• 484 ka balay ang may gamay nga guba

• 1 ka Kingdom Hall ang nawasak

• 4 ka Kingdom Hall ang may daku nga guba

• 18 ka Kingdom Hall ang may gamay nga guba

• 27 ka DRC ang nagapanghikot sa Ukraine

• 25,069 ka kauturan ang direkta nga ginbuligan sang DRC para makakita sang safe nga dalayunan

• 14,308 ka kauturan ang nagpalagyo pakadto sa iban nga pungsod kag ginabuligan subong sang ila Cristianong mga kauturan sa sina nga mga pungsod