Makapasubo nga suno sa report asta sang Marso 29, 2022, pito pa ka kauturan naton ang napatay sa siudad sang Mariupol. Gani, 17 na ka kauturan ang napatay sa Ukraine.

Ang mga Disaster Relief Committee (DRC) sa Ukraine wala untat sa pagdala sang mga bulig. Ginarisgo pa gani nila ang ila kabuhi para sa pareho nila nga mga Saksi sa mga lugar nga naapektuhan gid sang inaway.

Halimbawa, ang mga kauturan halin sa DRC nakadeliber na sang pagkaon, bulong, kag iban pa nga mga kinahanglanon sa mga lugar nga nahalitan gid sang inaway pareho sang mga siudad sang Kharkiv, Kramatorsk, kag Mariupol. Ang isa ka miembro sang DRC nagbiyahe sing sobra 500 ka kilometro. Naglabay sia sa madamo nga checkpoint sang militar para magdeliber sang pagkaon kag bulong sa mga 2,700 ka kauturan.

Ang mga DRC nag-organisar man sang mga salakyan para buligan ang mga kauturan nga makapalagyo sa mga lugar nga nahalitan gid sang inaway. Ang isa ka brother halin sa DRC sa Chernihiv, nagsiling: “Sang ginbombahan sang mga soldado ang mga pamalay, maathag nga delikado na gid katama kon indi maghalin ang mga kauturan sa siudad. Wala na sing kuryente kag Internet, gani bisan nagabinombahanay, ginkadtuan sang mga elder ang mga kauturan sa siudad nga nagapanago sa mga basement, para pabal-on sila nga may available nga mga salakyan para makapalagyo sila.”

Ang tag-iya sang isa ka kompanya sang de-pasahero nga mga salakyan nagpasugot nga gamiton ang iya mga van kag mga bus. Siam ka trip ang iya ginbiyahe para ma-rescue ang 254 ka kauturan sa Chernihiv. May bes pa gani nga para makaagi ang iya bus, ginkay-o niya anay ang dalan gamit ang iya mismo heavy equipment. Nagapasalamat gid ang mga kauturan sa iya bulig.

Nagabuylog kita sa kalisod sang mga napatyan sang ila pinalangga bangod sa sining inaway. Ginahulat na gid naton nga matuman ang ginapromisa sang Pulong sang Dios, ang Biblia, nga maabot ang tion nga wala na sing kamatayon kag paglalaw.—Bugna 21:3, 4.

Ang masunod amo ang report halin sa Ukraine nga natipon asta sang Marso 29, 2022. Ini nga mga numero base sa kompirmado nga mga report sang mga kauturan. Pero mahimo nga indi lang amo sini ang aktual nga report bangod indi pirme makontak ang tanan nga rehiyon sa pungsod.

• 17 ka kauturan ang napatay

• 35 ka kauturan ang nasamaran

• 36,313 ka kauturan ang nagbakwit pakadto sa mas safe nga mga lugar sa pungsod

• 114 ka balay ang nawasak

• 144 ka balay ang may daku nga guba

• 612 ka balay ang may gamay nga guba

• 1 ka Kingdom Hall ang nawasak

• 7 ka Kingdom Hall ang may daku nga guba

• 23 ka Kingdom Hall ang may gamay nga guba

• 27 ka DRC ang nagapanghikot sa Ukraine

• 34,739 ka kauturan ang direkta nga ginbuligan sang DRC para makakita sang safe nga dalayunan

• 16,175 ka kauturan ang nagpalagyo pakadto sa iban nga pungsod kag ginabuligan subong sang ila Cristianong mga kauturan sa sina nga mga pungsod