Makapasubo nga madamo pa gid nga kauturan naton ang napatay bangod sa inaway sa Ukraine. May 28 na ka Saksi ni Jehova nga napatay.

Suno sa ginreport sa balita, ang mga banwa malapit sa Kyiv nakaeksperiensia sang grabe gid nga inaway sa una nga mga semana. Sa mga 4,900 ka kauturan sa sini nga rehiyon, sobra 3,500 na ang nakapalagyo sa mas safe nga mga lugar.

Ginapakita sang masunod nga mga eksperiensia ang mabakod nga pagtuo sang mga kauturan sa sini nga mga lugar, bisan pa sang grabe nga mga kabudlayan.

Si Oleksandr, nga isa ka elder sa banwa sang Makariv, nakapalagyo sa mas safe nga lugar sa central Ukraine. Pero, apat ka kauturan sa iya field service group ang indi niya makontak. Bangod nabalaka gid sia sa ila, nagbalik sia para pangitaon sila bisan grabe ang inaway. Sia nagsiling: “Naintiendihan ko nga para kay Jehova, importante gid ang mga nagasimba sa iya. . . . Sang nag-abot ako sa ugsaran sang balay sang isa ka utod, nakita ko nga naigo ini sang mga bomba. Sirado ang puertahan pakadto sa basement sang balay kag wala sing may nagasabat sa akon pagpanawag. Kinulbaan gid ako.” Nakasulod si Oleksandr sa puertahan pakadto sa basement kag nakita niya ang grupo sang mga tawo nga nagatulok sa iya. Nakita niya ang mga kauturan nga nagapanago didto upod sa ila indi Saksi nga mga kaingod.

Si Yaroslav, nga isa sa mga utod nga ato sa basement, nagsiling nga walo ka adlaw na sila nga nagapanago didto. Nagsiling pa sia: “Diutay lang nga biskwit kag isa ka baso nga tubig kada adlaw ang pagkaon sang kada isa sa amon.” Pero nagabasa kami sang Biblia kag sang mga publikasyon, nagapangamuyo, kag nagapalig-unanay. Sang nabatian ko nga gintawag ako ni Oleksandr, abi ko may nag-abot nga mga soldado para kuhaon ako. Abi ko mapatay na ako. . . . [Pero,] gin-rescue niya kami tanan. Nagapasalamat gid kami kay Jehova kay may ara kami sang mga kauturan. Nagapangamuyo sila para sa amon kag ginarisgo pa nila ang ila kabuhi para ma-rescue kami.

Si Pylyp kag ang isa pa ka brother nagdesisyon nga dal-an sing pagkaon ang mga kauturan nga nagpabilin sa banwa sang Borodianka. Sang Marso 17, samtang nagabiyahe sila pakadto sa banwa, gin-agaw sang mga soldado ang salakyan ni Pylyp kag ginkuha ang pagkaon nga dala nila. Dayon, gin-aresto sila sang mga soldado, ginpusasan, gintabunan ang ila mga mata, kag gindala sila sa isa ka gamay nga kuarto sa basement upod sa pito pa ka lalaki. Pagligad sang duha pa ka adlaw, ginsaylo sila sa isa pa ka selda kag ginakastigo sila sang mga guardia kon gab-i. Si Pylyp nagsiling: “Wala ’ko kabalo kon maka-survive pa ako. Nagpangamuyo ako nga padayon nga mangin matutom.”

Isa ka bes sang ginakastigo sia, nangamuyo sing matunog si Pylyp. Ginpangamuyo niya ang tigulang nga mga sister nga wala sing pagkaon, nga tani safe lang ang iya pamilya, kag ginpasalamatan niya si Jehova kay nangin malipayon gid sia sa iya pag-alagad sa sulod sang mga tinuig. Ginbalik sia sang guardia sa iya selda, kag ginpangamuyo naman niya nga maintiendihan sang mga soldado nga wala sing ginahimo nga malain ang mga kauturan. Gin-preachingan sining duha ka brother ang mga guardia. Sa sulod sang duha ka adlaw, gin-preachingan nila ang tanan nga guardia sang kada shift. Dugang pa, isa sa kaupod nila nga priso ang nangin interesado sa mensahe sang Biblia. Ginpasalamatan niya ining duha ka brother. Sang Marso 27, ining duha ka brother kag ang lalaki nga nangin interesado ginpagua sa prisuhan.

Si Svitlana nga isa ka single nga sister nga taga-Bucha, indi gid makapalagyo sa sulod sang duha ka semana. Nagsiling sia: “Nag-athag gid sa akon kon daw ano ka importante ang paghidait nga ginahatag ni Jehova. Kon ara sa aton ang paghidait sang Dios, indi buot silingon nga bal-an ta gid kon ano ang aton himuon. Kundi nagakahulugan ini nga kon indi na ta kabalo kon ano ang aton himuon, nagasalig kita sing bug-os kay Jehova.”

Sang nakabiyahe na si Svitlana pakadto sa mas safe nga lugar sang Ukraine, gin-preachingan niya ang isa ka babayi kag ang hinablos sini. Nag-abot sila tanan sa mas safe nga lugar kag gin-abiabi sila sang isa ka pamilya nga Saksi. Ginpadayon sini nga pamilya sa ila balay si Svitlana upod ang babayi kag ang hinablos sini. Pagkaaga, nagsiling ang babayi nga gusto niya mag-attend sa miting sang kongregasyon kag nangayo man sia sang Biblia kag sang aton mga literatura. Padayon sia nga ginakontak ni Svitlana asta subong.

Ang masunod amo ang report halin sa Ukraine nga natipon asta sang Abril 12, 2022. Ini nga mga numero base sa kompirmado nga mga report sang mga kauturan. Pero mahimo nga indi lang amo sini ang aktual nga mga report bangod indi pirme makontak ang tanan nga rehiyon sa pungsod.

• 28 ka kauturan ang napatay

• 48 ka kauturan ang nasamaran

• 40,778 ka kauturan ang nagbakwit pakadto sa mas safe nga mga lugar sa pungsod

• 278 ka balay ang nawasak

• 268 ka balay ang may daku nga guba

• 746 ka balay ang may gamay nga guba

• 1 ka Kingdom Hall ang nawasak

• 9 ka Kingdom Hall ang may daku nga guba

• 26 ka Kingdom Hall ang may gamay nga guba

• 27 ka Disaster Relief Committee (DRC) ang nagapanghikot sa Ukraine

• 41,974 ka kauturan ang direkta nga ginbuligan sang DRC para makakita sang safe nga dalayunan

• 18,097 ka kauturan ang nagpalagyo pakadto sa iban nga pungsod kag ginabuligan subong sang ila Cristianong mga kauturan sa sina nga mga pungsod