Samtang nagagrabe pa gid ang sitwasyon sa Ukraine, mas ginapanikasugan man sang branch sa Ukraine nga ma-shepherding ang mga kauturan. Ginatinguhaan gid sang responsable nga mga brother sa bilog nga pungsod nga mapaumpawan kag mapalig-on paagi sa Biblia ang linibo ka kauturan nga nagbakwit sa iban nga mga bahin sang pungsod. Nakabenepisyo gid ang mga kauturan sa sining makapalig-on nga pagbisita. Sang ginbisita sang isa ka miembro sang Branch Committee ang nagbakwit nga mga kauturan sa western Ukraine, ang isa ka sister nga nagadayon upod sa mga 30 ka kauturan sa isa ka Kingdom Hall sa siudad sang Uzhgorod, nagsiling: “Pamatyag ko daw pareho lang nga ginahakos ako ni Jehova.”

Ginapanikasugan man sini nga mga brother nga i-shepherding ang mga 100 ka maisog nga miembro sang 27 ka Disaster Relief Committee (DRC). Si Ihor, nga isa ka miembro sang DRC, nagsiling: “Sang gin-asayn ako nga magbulig sa DRC, kami sang akon asawa bag-o lang nagbakwit kag nagadayon sa iban nga balay. Sang kapoy na gid kami, ang isa ka miembro sang Branch Committee, nga masako man kaayo, naghatag gid sang tion para bisitahon kami kag mamati sing maayo sa amon. Nabatyagan namon nga interesado gid sia sa amon kaayuhan.” Si Ihor nagsiling pa: “Sang ara kami sa sitwasyon nga daw pareho kami sang lapsag, nga wala sing kontrol sa amon sitwasyon, kag kon indi kami makahibalo sang amon himuon amo nga nagapangamuyo na lang kami kay Jehova para sa panuytoy, pirme gid namon masaksihan nga wala niya kami ginapabay-an.”

Kon parte sa mga Kingdom Hall sa mga lugar nga may inaway, 4 ang nawasak gid, 8 ang may daku nga guba, kag 33 ang may gamay nga guba.

Ang masunod amo ang report halin sa Ukraine nga natipon asta sang Mayo 17, 2022. Ini nga mga numero base sa kompirmado nga mga report sang mga kauturan. Pero mahimo nga indi lang amo sini ang aktual nga mga report bangod indi pirme makontak ang tanan nga rehiyon sa pungsod.

• 37 ka kauturan ang napatay

• 74 ka kauturan ang nasamaran

• 45,253 ka kauturan ang nagbakwit pakadto sa mas safe nga mga lugar sa pungsod

• 418 ka balay ang nawasak

• 466 ka balay ang may daku nga guba

• 1,213 ka balay ang may gamay nga guba

• 4 ka Kingdom Hall ang nawasak

• 8 ka Kingdom Hall ang may daku nga guba

• 33 ka Kingdom Hall ang may gamay nga guba

• 27 ka DRC ang nagapanghikot sa Ukraine

• 48,806 ka kauturan ang direkta nga ginbuligan sang DRC para makakita sang safe nga dalayunan

• 21,786 ka kauturan ang nagpalagyo pakadto sa iban nga pungsod kag ginabuligan subong sang ila Cristianong mga kauturan sa sina nga mga pungsod