Ang branch sa Ukraine, upod ang 27 ka Disaster Relief Committee (DRC), padayon nga nagabulig sa nagbakwit nga mga kauturan sa pungsod. Halin sang pag-umpisa sang inaway, sobra na sa 250 ka tonelada nga bulig ang ginpadala sang Poland, lakip ang mga pagkaon, bayo, kag mga hygienic items. Gindugangan ini sang sobra 80 ka tonelada nga pagkaon nga ginhatag sang mga kauturan nga nagaistar sa mas safe nga mga lugar sa Ukraine.

Ang isa ka sister nga si Valentyna, nga taga-Kyiv, nagsulat parte sa bulig nga nabaton niya halin sa mga kauturan paagi sa DRC. Sia nagsiling: “Sang nag-umpisa ang inaway, delikado na gid nga magpabilin sa siudad. Gani, nagbakwit ako sa isa ka gamay nga banwa sa rehiyon sang Cherkasy. Diri na ako nagaistar sa sulod sang sobra duha ka bulan. Gin-atipan gid ako sang mga kauturan sa kongregasyon diri. Gindal-an nila ako sang pila ka kahon sang pagkaon kag mga hygiene products. Sang nakita ko ang ila pagbulig, nangin emosyonal gid ako. Ang isa sa mga kahon, may drowing sang isa ka bata nga si Blanca nga 4 anyos kag isa ka postcard nga ginhimo paagi sa watercolor . . . Taguon ko ini nga mga drowing para mangin remembrance. Sinsero gid ako nga nagapasalamat sa tanan ko nga kauturan kag ilabi na gid kay Jehova.”

Si Valentyna, isa ka 83 anyos nga dis-ebol nga sister halin Sieverodonetsk, nagsulat: “Sang nag-umpisa ang inaway, nagapangabuhi ako sing isahanon. Napatay ang bugtong ko nga bata antes sang inaway. Makahaladlok gid kay ginabombahan ang siudad sa bilog nga adlaw. Wala sang tubig, kuryente, gas, kag mahinay ang Internet. Nagapasalamat gid ako sa mga kauturan nga nagrisgo sang ila kabuhi para buligan ako.”

Sia nagsiling pa: “Sang ulihi, gindala ako sang mga kauturan, upod sa duha pa ka dis-ebol nga sister sa Dnipro, kay mas safe ini nga siudad. Sa Dnipro, ginbuligan ako sang mga kauturan nga makakita sang dalayunan. Subong, nagaistar ako sa isa ka pamilya nga Saksi nga amo ang nagaatipan sa akon. Ginkabig nila ako nga daw miembro sang ila pamilya. Ginbuligan pa gani nila ako nga makatigayon sang smartphone para maka-attend ako kag makapakigbahin sa mga miting. Indi ko gid malipatan ang kaayo nga ginpakita sang mga kauturan sa akon.”

Nalipay gid kita kag nagapasalamat sa aton mahigugmaon nga Amay, si Jehova, nga padayon nga nagaatipan sa aton pinalangga nga mga kauturan sa Ukraine para ‘indi sila pagkulangon sing maayo nga butang.’—Salmo 34:10.

Ang masunod amo ang report halin sa Ukraine nga natipon asta sang Hunyo 7, 2022. Ini nga mga numero base sa kompirmado nga mga report sang mga kauturan. Pero mahimo nga indi lang amo sini ang aktual nga mga report bangod indi pirme makontak ang tanan nga rehiyon sa pungsod.

• 42 ka kauturan ang napatay

• 82 ka kauturan ang nasamaran

• 46,145 ka kauturan ang nagbakwit pakadto sa mas safe nga mga lugar sa pungsod

• 469 ka balay ang nawasak

• 540 ka balay ang may daku nga guba

• 1,405 ka balay ang may gamay nga guba

• 5 ka Kingdom Hall ang nawasak

• 8 ka Kingdom Hall ang may daku nga guba

• 33 ka Kingdom Hall ang may gamay nga guba

• 27 ka DRC ang nagapanghikot sa Ukraine

• 50,663 ka kauturan ang direkta nga ginbuligan sang DRC para makakita sang safe nga dalayunan

• 22,995 ka kauturan ang nagpalagyo pakadto sa iban nga pungsod kag ginabuligan subong sang ila Cristianong mga kauturan sa sina nga mga pungsod