Sobra isa ka gatos ka tuig na nga may mga Saksi ni Jehova sa Ukraine. Narehistro sila sang Pebrero 28, 1991, antes nangin independiente nga pungsod ang Ukraine.

Naeksperiensiahan sang mga Saksi ni Jehova sa Ukraine ang grabe nga paghingabot sa mga rehimen sang Nazi kag Soviet. Sang Abril 8, 1951, sobra 6,100 ka Saksi halin sa katundan nga bahin sang Ukraine ang gintapok sa Siberia. Medyo nag-ayoayo ang sitwasyon sang Hunyo 1965, sang nagdesisyon ang Supreme Court nga parte lang sa relihion ang mga literatura sang mga Saksi ni Jehova kag indi ini kontra sa Soviet. Gin-untatan sang mga awtoridad ang pag-aresto sa mga tawo nga nagabasa sang literatura sang mga Saksi, pero ginpriso nila gihapon ang mga Saksi nga nagaistorya sang ila pagpati sa iban. Sang Septiembre 1965, bangod sang amnestiya sang gobierno, ginhilway ang tanan nga gintapok sa Siberia sang 1951, pero ang kalabanan sa ila wala ginpabalik sa ila balay. Ang grabe nga paghingabot nagpadayon asta sa una nga mga tinuig sang dekada ’80.

Subong, hilway na nga makatipon para magsimba ang mga Saksi ni Jehova kag makabantala naman sila nga wala ginabalabagan sang mga awtoridad. Pero, pirme gihapon biktima ang mga Saksi sang mga krimen bangod sang diskriminasyon. Wala halos sang ginahimo ang mga awtoridad para proteksionan ang mga Saksi sa mga pag-atake sa ila kag sa mga lugar nga ila ginagamit sa pagsimba kag sa masami wala man ginakasuhan ang mga nagahimo sini nga krimen. Bangod wala sang aksion ang mga awtoridad, indi man masilutan ang mga nagahimo sini nga krimen, kag bangod nagakinagamo pa sa sidlangan nga bahin sang pungsod, naglala na gid ang pagpang-atake sa mga Saksi.