Sang Oktubre 9, 2022, gin-release ni Brother Paul Norton, miembro sang Branch Committee sa Britain, ang The Bible—The Good News According to Matthew sa Punjabi (Shahmukhi) paagi sa isa ka live nga programa. Sobra 1,300 ang nag-attend, lakip ang mga kauturan nga nag-tie in sa mga Kingdom Hall nga sakop sang teritoryo sang branch sa Britain. Ini nga libro sa Biblia nangin available dayon sa audio, digital, kag naimprinta nga pormat.

Ang Punjabi ginahambal sang minilyon ka tawo sa India kag Pakistan, pati man sang madamo nga tawo sa iban nga pungsod. Ang kompleto nga Bag-ong Kalibutan nga Badbad sang Balaan nga Kasulatan sa Punjabi nga ginsulat sa Gurmukhi script gin-release sang Oktubre 2020. Pero, ining bag-o nga edisyon para sa mga nagabasa sang Punjabi sa Shahmukhi script, kay sa masami indi sila kabalo magbasa sang Gurmukhi script ukon indi nila ini maintiendihan sing maayo. Asta subong, ang mga bumalasa sang Punjabi (Shahmukhi) nagagamit sang translation sang Biblia sa iban nga lenguahe, pareho sang Urdu.

Sa sulod sang madamo nga tinuig, may pila na ka libro sang Biblia sa Punjabi (Shahmukhi) nga na-translate. Pero, ining gin-release nga libro sang Mateo mahapos basahon kag intiendihon. Kag ang importante sa tanan, makita sa sini nga translation ang ngalan ni Jehova.

Ang isa ka translator nga nangin bahin sini nga proyekto, nagsiling: “Posible nabatian na sang mga tawo ang ngalan ni Jehova sa mga kanta sa simbahan. Pero bangod gindula sang iban nga mga translator ang ngalan sang Dios sa kalabanan nga bersikulo sang Biblia, nagbatyag ang mga tawo nga indi sila makapalapit sa Dios. Subong, mabasa na nila ang ngalan sang Dios sa sining libro sa Biblia sa nagakaigo nga lugar sini.”

Nagasalig gid kita nga ini nga libro sa Biblia magabulig sa aton mga kauturan nga padayon nga magpalapit kay Jehova kag magdayaw sa iya ngalan.—Mateo 6:9.