Sang Marso 17, 2020, ginbasura sang Court of Appeal sang England and Wales ang isa ka aplikasyon para iapelar ang desisyon sang High Court (trial court) nga nagasuporta sang aton kinamatarong nga sundon ang ginapatuman sang Biblia parte sa pag-disfellowship.

Ang High Court nagdesisyon nga ang kongregasyon may kinamatarong sa pagpahibalo nga ang isa ka indibiduwal indi na isa sa mga Saksi ni Jehova kag indi tuyo sini nga pahibalo nga pakahuy-an ukon gub-on ang reputasyon sang indibiduwal. Ang judge sang trial court nga si Richard Spearman, Q.C., nagsiling sa iya desisyon: “Natural lang nga ang isa ka relihioso nga grupo, nga nagatinguha nga sundon ang mga prinsipio sa Biblia, may kinamatarong nga magsikway sa isa nga nakasala. Nagakaigo ini, kag sa madamo nga sitwasyon, kinahanglan gid himuon. Kay ang isa nga indi makatuman ukon indi gusto magtuman sa mga prinsipio sa Biblia indi na kalipikado nga mangin bahin sina nga relihion. Kag kon ina nga indibiduwal indi pagsikwayon, mahimo mangin malain sia nga impluwensia sa iban nga mga miembro sang relihion.”

Pagkatapos sang desisyon sang trial court, ang indibiduwal sa sini nga kaso nag-file sang aplikasyon sa Court of Appeal para pahanugutan sia nga iapelar ang desisyon sang trial court. Ginbasura sang Court of Appeal ang aplikasyon kay “wala gid ini sing basihan,” kag nagsiling nga ang desisyon sang trial court “husto gid” kag ang “kinamatarong sa pagsikway maathag nga kinahanglan himuon sa isa ka relihioso nga organisasyon.”

Parte sa desisyon sang korte, si Shane Brady, nga isa ka abogado sang mga Saksi ni Jehova, nagsiling: “Ini nga desisyon pareho man sa mga nangin desisyon sang iban nga mga korte sa England, sang European Court of Human Rights, kag sang mga appellate court sa Canada, Continental Europe, kag United States. Ining tanan nga desisyon nagapamatuod nga ang mga Saksi ni Jehova may kinamatarong sa pagpili kon sin-o ang puede mangin bahin sang ila organisasyon.”

Nalipay kita nga ginakilala sang Korte ang aton kinamatarong nga sundon ang Biblia para proteksionan ang aton mga kongregasyon batok sa malain nga mga impluwensia.—1 Corinto 5:11; 2 Juan 9-11.