Sang gab-i sang Abril 7, duha ka prisuhan sa Palm Beach County, Florida, ang nag-broadcast sang ginrekord nga pamulongpulong sa Memoryal para matan-aw ini sang sobra 1,100 ka priso, bisan wala sang mga Saksi ni Jehova nga nakakadto para maghatag sang pamulongpulong.

Ang isa sa 12 ka brother nga nagaboluntaryo nga magkadto sa mga prisuhan kada semana para magtudlo sang Biblia, nagsiling: “Daw indi kami makapati nga daw kahapos lang sang tanan. Maathag nga gusto gid ni Jehova nga mabatian sining mga tawo ang pamulongpulong sa Memoryal.”

Ang mga brother naglisensia na sa pari sang prisuhan kon puede sila makaselebrar sang Memoryal sa duha ka prisuhan. Pero bangod sang COVID-19, wala na nila gindayon ini nga plano. Antes pa sila makapanumdom sang iban nga paagi, nakibot sila sang gintawgan sila sang pari para mangayo sang rekord sang pamulongpulong sa Memoryal. Nagahimo na gali sang kahimusan ang pari para ma-broadcast ang pamulongpulong sa duha ka prisuhan.

Wala labot sa video, nagplano man ang mga brother nga padal-an ang pari sang mga imbitasyon sa Memoryal para ipanagtag sa mga priso ukon i-displey sa prisuhan. Pero nakibot sila liwat kay nag-displey na gali ang pari sang mga pahibalo parte sa pamulongpulong sa Memoryal sa palibot sang mga prisuhan. Sang gab-i sang Memoryal, ang tanan nga priso makatan-aw sang pamulongpulong kon gusto nila.

Pagkatapos sang Memoryal, ginkontak sang pari ang mga brother para magpangayo sang dugang nga mga Biblia para sa mga priso kay ang tanan nga Biblia nga ginbilin nila sa mga prisuhan naubos na panagtag. Pero damo pa nga priso ang nagapangita sang Biblia.

Nalipay gid kita nga bisan ang mga rehas indi makapugong nga malab-ot sang Pulong sang Dios ang mga tawo.—Mateo 24:14.