Sang Nobiembre 23, 2023, si Mary M. Larimer, nga nag-graduate sa pinakauna nga klase sang Watchtower Bible College of Gilead, napatay na. a Natawo si Mary sa Scenery Hill, Pennsylvania, U.S.A., sang Hunyo 4, 1920. Sang 1935, sa edad nga 15, nabawtismuhan sia sa isa ka kombension sa Washington, D.C., U.S.A. Apat ka tuig sang ulihi, si Sister Larimer nangin isa ka regular pioneer kag kilala gid sia bilang mapisan nga manugbantala.

Sang Disiembre 1942, nakabaton si Mary sang imbitasyon halin kay Brother Nathan Knorr, nga amo ang nagapanguna sa organisasyon sadto, para mag-apply sa bag-o nga eskwelahan nga ginatawag nga Watchtower Bible College of Gilead. Nagsiling ini nga “ang katuyuan sini nga college amo nga ihanda ang ordinado nga mga ministro, lalaki man ukon babayi, para mangin misyonero sa tanan nga bahin sang kalibutan.” Ang imbitasyon nagsiling man: “Ang kada kurso sa sini nga college magalawig sing lima ka bulan . . . Kinahanglan gid ang kapisan, maid-id nga pagtuon kag trabaho para matapos ini nga kurso sa malip-ot nga tion.” Ginpasa dayon ni Mary ang iya aplikasyon.

Sang Pebrero 1, 1943, nagsugod ang klase ni Mary kag sang iya 99 ka classmate sa ila bag-o nga eskwelahan sa South Lansing, New York, U.S.A. Sa halos lima ka bulan nga kurso, nagtuon gid sing maayo si Mary parte sa Kasulatan. Maayo gid sia nga estudyante kag nag-graduate sia sang Hunyo 23, 1943.

Sang naka-graduate si Mary, nakabaton sia sang asaynment bilang misyonero sa Cuba. Ginsugid niya ang pila ka kabudlayan sa iya bag-o nga asaynment. Nagsiling sia: “Pigado ang mga tawo didto. Kinahanglan namon maglakat kon nagaministeryo . . . Wala kami sang salakyan.” Nagpabilin si Mary sa iya asaynment asta sang 1948, kag nagbalik sia sa Pennsylvania para atipanon ang iya nanay, nga may grabe nga injury. Sa masunod nga madamo nga tuig, nagpabilin si Mary nga single, kag masako gid sa pagministeryo kag iban pa nga hilikuton sa organisasyon. Sang napatay sia, nagaalagad sia sa isa ka kongregasyon sa Glendale, California, U.S.A.

Ang Watchtower Bible School of Gilead ara na sa Patterson, New York, diin ginahiwat subong ang ika-155 nga klase sini. Sang nabatian ni Brother Mark Noumair, isa ka instruktor sa Gilead, nga napatay na si Mary, sia nagsiling: “Isa ka bataon nga babayi si Mary Larimer nga halin sa gamay nga banwa kag handa gid nga magkadto bisan diin para sugiran ang mga tawo parte kay Jehova. Wala sia kabalo kon diin sia ipadala kag kon makabalik pa sia. Ang mga misyonero sa Gilead pareho kay Mary nakabulig para masugdan ang pag-uswag sang pagbantala nga hilikuton sa bilog nga kalibutan.”—Isaias 6:8.