PEBRERO 11, 2019
UNITED STATES
Bukas Na Para sa American Sign Language ang mga Eksibit sa World Headquarters Museum
Sugod sang Enero 2019, ang mga bisita sa museum sa world headquarters puede na maka-tour paagi sa American Sign Language (ASL). Si Enrique Ford, nga nagadumala sang Museum Department, nagsiling: “Dalayawon gid ang panikasog nga ginhimo sa translation kag computer programming para mangin available ang mga eksibit sini nga museum sa ASL! Sigurado gid nga maga-enjoy, mawili, kag madamo sing matun-an ang aton kauturan nga apa kag mahina ang palamatin-an sa ila pag-tour sa mga eksibit.”
Si Ana Barrios, nga isa ka apa kag nagaalagad bilang regular payunir sa New York, isa sa mga una nga nag-tour sa eksibit sa ASL. Nagsiling sia: “Nalipay gid ako sang matan-aw ko ang mga video sa ASL! Bisan pa naka-tour na ako sadto kag nakita ko na ang mga eksibit, wala nagdulot sa akon tagipusuon ang impormasyon kay indi ko gid bug-os nga maintiendihan ang Ingles nga mga kapsion. Pero sang natan-aw ko ang pila ka video sa ASL, nadugangan ang akon nabal-an parte sa ngalan ni Jehova. Natandog gid ako sang nakita ko sa eksibit ang parte sa personalidad ni Jehova, amo nga nakahibi ako!”
Nagsugod ang proyekto sa ASL sang Hunyo 2017. May 23 ka kauturan nga nagbuligay, pati ang 6 ka apa kag 6 ka utod nga indi apa pero nagdaku sa apa nga mga ginikanan, sa pag-translate kag paghimo sang mga video sa ASL. Ini nga grupo naghimo sing sobra 900 ka video, nga mga 9 ka oras ang kalawigon, nga pareho kalawig sa mga audio. Ini nga impormasyon para sa ASL ginrekord sa tatlo ka lugar: sa remote translation office sang ASL sa Fort Lauderdale, Florida; sa sanga sang United States sa Wallkill, New York; kag sa world headquarters sa Warwick, New York. Antes ginpagua ang final version sang ASL nga gamiton sa museum, ginpatan-aw anay ini sa mga kauturan nga apa nga sarisari ang edad kag ginhalinan. Nakabulig ini para mapanami pa gid ang translation kag labi nga maga-enjoy ang maga-tour sa museum sa ASL.
Pila sa mga kauturan nga nagbulig sa paghimo sang mga video nga ASL para sa museum sa Warwick.
Ang Museum Department nagbakal sang mga touch-screen device para tan-awan sang mga video sa ASL. Ang pormat sini pareho sang sa device nga ginagamit sa audio tour para sa eksibit sang museum sa Warwick. Nag-install man ang Museum Department sang mga video sang ASL sa 14 ka dalagku nga touch screen nga ara na nga daan sa dingding.
Si Mark Sanderson, nga miembro sang Nagadumala nga Hubon, nagsiling: “Ginhimo ang museum sa Warwick para pabakuron ang pagtuo sang tanan nga nagabisita sa world headquarters. Gani nalipay gid kami nga available na ang mga eksibit sa 14 ka lenguahe, lakip ang ASL para sa mga Saksi kag indi Saksi nga apa kag mahina ang palamatin-an.”
Subong, sobra tunga sa milyon na ang naka-tour sa Warwick. Ang mga kauturan sa bilog nga kalibutan ginaagda nga tan-awon ang mga eksibit kag matun-an sing dugang pa ang bugana nga espirituwal nga kasaysayan sang mga Saksi ni Jehova. Ang tanan nga magabisita diri mapalig-on pa gid nga ‘magsalig sa Dios.’—Salmo 78:7.
Bilang paghanda para sa pagpagua sang mga video sa ASL, ginarebyu sang brother ang mga video sa isa ka temporaryo nga studio nga ginbutang sa world headquarters sa Warwick, New York.
Tatlo ka bata nga indi apa pero may apa nga mga ginikanan, ang nagatan-aw sang ASL nga translation sang Bible sound drama sang 1977 nga may tig-ulo “Jehovah’s Name to Be Declared in All the Earth.”
Grupo sang mga kauturan nga naga-tour sa eksibit nga “The Bible and the Divine Name” nga may mga touch screen device.
Ginatan-aw sang mga bisita ang video nga ASL sa isa sa mga touch screen sa eksibit nga “A People for Jehovah’s Name.”
Ginatan-aw sang grupo sang mga naga-tour ang video nga ASL para sa displey nga may 500 ka slide sang “Photo-Drama of Creation.”
Basi Manamian Ka Man
BETHEL TOUR
United States of America
KABUHI SA BETHEL
Ginaagda Ka Namon nga Magbisita sa mga Pasilidad sang Bethel sa United States
Nalakip sa tour ang Ulong Talatapan sang mga Saksi ni Jehova kag mga opisina sang sanga sa U.S.