Pagkatapos nag-igo ang Bagyo Dorian sa mga isla sang Bahamas bilang Category 5 nga bagyo, ginwaswasan naman sini ang sidlangan nga baybayon sang United States. Sang Biernes sang aga, Septiembre 6, 2019, nag-agi ini bilang Category 1 nga bagyo sa Cape Hatteras, sa North Carolina, amo nga ginbahaan ang mga pamalay kag mga balaligyaan. Sang Septiembre 7, 2019, ginwaswasan naman sini ang Nova Scotia, sa Canada.

Ang branch sa United States nagreport nga sa 1,742 ka manugbantala sa Bahamas, isa lang ka sister ang nasamaran diutay. Suno sa report, 48 ka balay sang mga Saksi ang nahalitan kag 8 ang naguba gid.

Madamo nga manugbantala nga nagaistar sa Great Abaco Island ang ginpabakwit sa Nassau, ang kapital sang Bahamas. Malipayon sila nga ginsugat sang lokal nga mga kauturan sa erport.

Ang Disaster Relief Committee kag ang manugtatap sang sirkito didto nag-organisar sang relief work kag nag-shepherding sa mga manugbantala nga naapektuhan. May nag-abot man nga mga brother halin sa branch sa United States para magbulig sa relief work kag magpalig-on sa mga kongregasyon.

Sa United States, mas grabe nga nahalitan ang North kag South Carolina. Wala sing kauturan nga nasamaran sa sini nga bagyo, pero 737 ka kauturan ang kinahanglan magbakwit. Ang kalabanan sa ila kinahanglan nga mag-istar sing temporaryo sa iban nga lugar asta nga puede na istaran liwat ang ila mga balay. Nahalitan man ang 50 ka balay kag 12 ka Kingdom Hall.

Wala sing nahalitan nga mga kauturan sa Canada. Diutay lang ang halit sang bagyo sa balay sang pila naton ka kauturan kag may mga lugar nga nadulaan sing kuryente. Ang mga kauturan didto nagbulig sa mga naapektuhan.

Nagapasalamat kita nga ginapamatian ni Jehova ang “pagpangayo sing bulig” sang aton mga kauturan nga nagasalig sa iya sa sining tion sang kabudlayan.—Salmo 28:6.