Ang Bagyo Dorian, nga isa sa pinakamabaskog nga bagyo nga narekord sa Atlantic Ocean, nag-land fall bilang Category 5 sa Great Abaco Island sa naaminhan sang Bahamas sang Domingo sang aga, Septiembre 1, 2019. Delikado gid ang Bagyo Dorian bangod mahinay ang paglakat sini kag may dala nga mabaskog nga hangin kag grabe nga pag-ulan. Nag-agi man ini sa Leeward Islands, Puerto Rico, kag Virgin Islands pero wala gawa sing ginreport nga kahalitan.

Ang sanga sa United States padayon nga nagabaton sang mga report parte sa nangin epekto sang bagyo sa kauturan naton kag sa mga pasilidad nga ginapanag-iyahan sang sanga. Subong, wala sing ginreport nga nasamaran sa 46 ka manugbantala sa duha ka kongregasyon sa Great Abaco Island. Pero ang nagaisahanon nga Kingdom Hall sa sini nga isla naguba gid.

Sa Grand Bahama Island, may apat ka kongregasyon kag 364 ka manugbantala. Base sa una nga mga report, 196 sa aton kauturan ang nagbakwit kag 22 ka balay ang naguba. Tatlo ka balay ang nawasak gid.

Antes pa sang bagyo, naghatag na sing instruksion ang sanga sa lokal nga mga manugtatap sang sirkito kag mga gulang sa apektado nga mga lugar. Ginrekomendar sang sanga nga pabakwiton ang kauturan sa kapital nga siudad sang Nassau ukon sa iban nga lugar nga indi delikado.

Ginapangamuyo naton ang aton kauturan nga naapektuhan sini nga bagyo. Kabalo kita nga nakita ni Jehova ang ila kabudlayan kag padayon sia nga magahatag sing kusog sa pag-atubang sining mabudlay nga tion.—Salmo 46:1, 2.