Nabatian ni Mike Iwuchukwu ang iya bata nga si Melody nga nagadalagan pasaka sa hagdan sang mag-lunch break ini sa iya online school. Ginsundan niya ang iya mapagsik nga anom ka tuig nga bata kay abi niya nagakaon ini sang sandwich ukon nagahampang. Pero nalipay gid sia sa iya nakita.

“Nagapungko ini sa atubang sang iya laptop nga nagauyat sang Mga Leksion nga Matun-an Mo sa Biblia, kag nagapamati sa iya ang iya tatlo ka klasmeyt,” siling ni Mike. “Si Melody nagsiling sa akon: ‘Pa, naga-Bible study ’ko!’”

Gusto gid ni Melody nga may ma-Bible study sia sugod pa sang Septiembre 2020, sang nag-online class ang iya eskwelahan sa Houston, Texas, bangod sa coronavirus nga pandemic. Gani nagpangamuyo sia kay Jehova kag nagpangita sing kahigayunan nga makasugod sing Bible study.

Si Mike kag ang iya asawa nga si Octavia, proud gid sa ila bata. Si Mike nagsiling: “Pirme ginasugiran ni Melody ang iya mga klasmeyt parte kay Jehova. Pero sang nakita namon sia nga may gina-Bible study, grabe gid ang kalipay namon ni Mama niya.”

Padayon ang regular nga pag-Bible study ni Melody sa iya mga klasmeyt. Sia nagsiling: “Natudluan ko na sila parte sa Paraiso kag parte kay Jesus. Gusto ko nga mangin mga Saksi ni Jehova man sila!”

Ang siam ka tuig nga si Samuel Molnar sa Ingleside, Illinois, nagasugid man sa iban parte sa iya pagtuo.

Sang mabatian ni Samuel ang eksperiensia sang isa ka brother nga nagpanaksi sa iya kaingod sa pihak sang kudal, gusto man niya ini himuon. Sang nakita niya ang apo nga lalaki sang ila kaingod nga nagahampang sa pihak sang kudal nila sa likod-balay, ginpamangkot niya ang bata nga lalaki kon gusto sini nga magpamati sang istorya parte sa Paraiso. Nagsugot ang bata nga lalaki, gani nagdalagan si Samuel pasulod sa ila balay para magkuha sang Ang Akon Libro sang mga Sugilanon sa Biblia.

Si Samuel nagsiling: “Ginsugiran ko sia nga sa ulihi puede na sia makahampang sa mga sapat kay indi na ini delikado. Ginbasa ko man sa iya ang istorya ni Daniel sa lungib sang mga leon.”

Pero indi lang amo sina ang ginhimo ni Samuel. Ginsulatan niya ang bata nga lalaki kag ginsugiran ini parte sa mga hilimuon kag mga video nga makita sa jw.org. Nagsugtanay sila nga magbasa liwat sang iban pa nga istorya sa Biblia kon magkitaay sila liwat.

Eksayted gid si Samuel sa iya eksperiensia kag may bag-o naman sia nga goal. “Gusto ko mabal-an ang parte sa tanan nga tract nga ara sa Teaching Toolbox, para magamit ko ini sa pagtudlo sa mga tawo,” siling niya.

Nahimo sang tatlo ka pamatan-on nga sister sa Houston ang ila goal sa pag-alagad: mag-uxiliary payunir sa tion sang ila bakasyon sa tingadlaw.

Sang Agosto, si Joselyn Horta nga 13 anyos; si Melanie Alvarez, nga 12 anyos; kag si Chloe Rodriguez nga 10 anyos, nagaupdanay paagi sa videoconference para maghimo sing mga sulat. Asta sa lima ka beses sila nga nagaupdanay kada semana kag mga 7:00 a.m. pa lang nagaumpisa na sila.

“Nagaistoryahanay kami kag dungan kami magkaon,” siling ni Joselyn, “dayon pag-abot sang 7:30 a.m., nagasugod na kami sa pagsulat.” Kon kis-a, may isa sa amon nga tatlo nga nagakaburawan, gani teksan sia sang duha sang: “Good morning! Bangon na! Preaching ’ta!”

Ang mapagsik nga panikasog sining mga pamatan-on nagpalig-on gid sa kada isa sa ila kag pati man sa ila mga abyan kag pamilya. “Kon kis-a daw wala ako sing kusog nga magbantala,” siling sang nanay ni Joselyn nga si Alicia. “Pero kon makita ko si Joselyn nga nagapungko na dira, masiling ko sa akon kaugalingon, ‘Ma-preaching man ‘ko a!’”

Nalipay gid si Jehova nga makita ang tanan nga pamatan-on nga nagahimo sang ila pinakamasarangan sa pagministeryo sa sining tion sang pandemic.—Hulubaton 27:11.