OKTUBRE 17, 2024
UNITED STATES
Ginwaswasan sang Bagyo Milton ang Florida, U.S.A.
Sang Oktubre 9, 2024, nag-landfall ang Category 3 nga Bagyo Milton sa Gulf Coast sang Florida, U.S.A. Daku gid ang halit sini sa bilog nga Florida. Nagwaswas ining mabaskog nga bagyo wala pa duha ka semana nga nag-agi ang Bagyo Helene sa sini nga lugar. Gani mas madamo nga lugar ang nabahaan kag nahalitan. Ang hangin nga dala sang Bagyo Milton may kabaskugon nga 289 ka kilometro kada oras. Sa pila ka lugar nga malapit sa baybayon mas mabaskog ang ulan kag naglab-ot ini sa 45 ka sentimetro. Ang storm surge naglab-ot sa 3 ka metro ang kataason nga nangin rason sang grabe nga pagbaha.
Dugang pa, grabe ang halit sang Bagyo Milton sa madamo nga lugar kay nagdala ini sang mga 38 ka buhawi sa bilog nga southern kag central Florida. Mga 80,000 ka tawo ang ara sa mga lugar nga wala gihapon sang kuryente kag indi magnubo sa 24 ang napatay.
Epekto sa Aton mga Kauturan
Wala sang utod nga napatay
2 ka manugbantala ang may grabe nga injury
4 ka manugbantala ang may gamay nga injury
9,949 ka manugbantala ang nagbakwit
16 ka balay ang nawasak
235 ka balay ang may daku nga guba
1,398 ka balay ang may gamay nga guba
1 ka Kingdom Hall ang may gamay nga guba
30 ka Kingdom Hall ang wala gihapon sang kuryente kag indi pa puede magamit
Pagbulig
Mga kauturan nga nagakuha sang natumba nga kahoy sa atop sang balay sang isa ka tigulang nga sister sa Zephyrhills, Florida
Duha ka adlaw antes mag-landfall ang Bagyo Milton, ang branch sa United States nagpadala sang sulat sa sobra 800 ka kongregasyon nga maagyan sang bagyo. Mabasa sa sulat ang mga impormasyon nga makabulig sa mga gusto magbakwit
Ang mga manugtatap sang sirkito kag ang mga gulang nagahatag sang paumpaw halin sa Biblia kag sang praktikal nga bulig sa mga kauturan nga naapektuhan sang Bagyo Helene kag Bagyo Milton
Tatlo ka Disaster Relief Committee ang gin-asayn para magdumala sang pagbulig sa mga naapektuhan sining duha ka bagyo
Ginatos ka Saksi sa Georgia kag South Carolina, U.S.A., ang nagpadayon sa ila balay sang mga kauturan nga nagbakwit
Ginapangamuyo gid naton ang tanan naton nga kauturan nga naapektuhan sang mabaskog nga mga bagyo nga padayon sila nga hatagan ni Jehova sang mapasilungan.—Isaias 4:6.
Tan-awa Man
MGA PIRME GINAPAMANGKOT
Nagabulig Bala ang mga Saksi ni Jehova sa Tion sang Kalamidad?
Hibalua kon paano kami nagabulig sa tion sang kalamidad sa mga Saksi kag sa iban.