Ang isa sa pinakaimportante nga okasyon sa aton moderno nga kasaysayan natabo 100 ka tuig na ang nagligad sang Septiembre 5-13, 1922, sang ginhiwat sang mga Saksi ni Jehova ang siam ka adlaw nga kombension sa Cedar Point, Ohio, U.S.A. Nag-attend sa sini kombension ang mga delegado halin sa madamo nga lugar sa United States, Canada, kag Europe. Ang average nga tumalambong kada adlaw naglab-ot sa 10,000, kag ang mga pamulongpulong gindeliber sing dungan sa mga 11 ka lenguahe.

May ginbuksan nga bag-o nga museum sa world headquarters sang mga Saksi ni Jehova para sa sining indi gid malipatan nga kombension. Makita sa sini nga museum ang istorya parte sa sini nga kombension kag kon ano ang epekto sini sa pagbantala nga hilikuton. Subong, ini nga museum bukas para sa pamilya Bethel kag buksan man ini sa publiko kon puede na maka-tour liwat.

Ang pinakaimportante nga bahin sang kombension sa Cedar Point natabo sang Septiembre 8. Sina nga adlaw, mga 8,000 ka tumalambong ang nagkadto sa awditoryum malapit sa matahom nga Lake Erie. Nagkadto sila para pamatian ang pamulongpulong ni Brother Joseph F. Rutherford nga “Ang Ginharian.”

Pagkatapos sang 1 ka oras kag tunga nga pamulongpulong ni Brother Rutherford nakalab-ot sia sa pinakaimportante nga bahin. Ginpamangkot niya ang mga tumalambong kon nagapati sila nga ang Cristo nagagahom na. Mabaskog kag sigurado gid ang sabat sang mga tumalambong nga nagapati sila. Nagsiling dayon si Brother Rutherford: “Dapat ninyo ini ipahibalo sa tanan. Gani, ibantala, ibantala, ibantala.” Dayon, nagbuklad ang isa ka daku nga telon nga may nakasulat: “Advertise the King and Kingdom” (Ibantala ang Hari kag ang Ginharian).

Ang panawagan nga ibantala ang maayong balita nagpalig-on gid sa mga tumalambong nga magpokus sa ministeryo. Madamo sa mga tumalambong ang nagabantala na, pero ang pamulongpulong ni Brother Rutherford nagpahulag sa ila nga dugangan pa gid ang ila panikasog, labi na gid kay sa sini nga tion amat-amat na nga ginaorganisar sing maayo ang pagpamalaybalay. Si Sister Ethel Bennecoff, nga malapit na mag-30 anyos sina nga tion, nagsiling nga pagkatapos sinang makapalig-on nga pamulongpulong, ang mga Estudyante sang Biblia naglakat nga “nadugangan ang [ila] kakugi kag gugma.” Si Sister Odessa Tuck, nga 18 anyos sang 1922, nagsiling: “Gusto ko ilugon si Isaias, nga nagsiling: ‘Yari ako! Ipadala ako!’”

Duha ka adlaw sa tapos sang pamulongpulong ni Brother Rutherford, ang International Bible Student Association naghimo sang isa ka resolusyon. Ang isa ka bahin sini nga resolusyon, nagsiling: “Bilang isa ka grupo sang mga Cristiano nga determinado nga magtuman kag magsunod sa aton Ginuo kag Manluluwas nga si Jesucristo, wala kita nagaentra sa inaway, rebolusyon, anarkiya, ukon sa bisan ano nga porma sang kapintas; kag wala man kita nagaugyon sa sala nga paggamit sang Biblia para dayaan kag tuntuhon ang mga tawo. Ginahandum gid naton ang paghidait.” Ginpakita sini nga resolusyon nga lain gid ang mga Estudyante sang Biblia sa iban nga mga relihion nga nagsuporta sang kapintas nga natabo sang World War I kag magasuporta sini liwat sang natabo ang World War II.

Ang Hunyo 15, 1922 nga isyu sang The Watchtower nagsiling: “Himuon namon ang tanan para nga ang 1922 nga general convention, mangin ang pinakamanami nga kombension. . . . Nagalaum kami nga ini nga kombension indi gid malipatan sang linibo ka tawo nga magatambong sa sini.”

Natabo gid ina. Pagligad sang isa ka gatos ka tuig ginapakamaayo gihapon ni Jehova ang hilikuton nga pagbantala parte sa Hari kag sa iya Ginharian.—Mateo 24:14.