Sang semana sang Septiembre 16, 2019, ginwaswasan sang Bagyo Imelda ang pila ka lugar sa bagatnan-sidlangan sang Texas kag nagresulta ini sa grabe nga pagbaha. Sa sulod lang sa pila ka adlaw, sobra 102 ka sentimetro ang nagbuhos nga ulan. Ginapatihan nga amo ini ang isa sa mga bagyo nga nagdala sang pinakamadamo nga ulan sa United States. Pagkatapos sang bagyo, ginatos ka salakyan ang ginbiyaan lang sa mga highway kag sa iban pa nga karsada. Madamo nga pumuluyo ang nagbakwit.

Base sa una nga mga report sang sanga sang United States, wala sing nahalitan ukon napatay sa 29,649 ka kauturan nga nagaistar sa naapektuhan nga mga lugar. Pero, 114 ka kauturan ang kinahanglan magbakwit. Dugang pa, 145 ka balay sang aton kauturan ang naguba. Kag may napulo ka Kingdom Hall nga naguba man.

May gin-asayn na nga Disaster Relief Committee ang sanga kag nagabulig ini sa mga manugtatap sang sirkito kag mga gulang para mabal-an kon daw ano kadaku ang halit kag para magpadala sing bulig. Nahibaluan naton nga suportahan ni Jehova ang aton kauturan, bangod ang iya “mainunungon nga gugma nagalambot sa mga langit.”—Salmo 36:5.