Sang Marso 2020, gin-untat anay ang face-to-face nga rehiyonal nga mga kombension bangod sang COVID-19 nga pandemic. Sini nga tuig, sobra 6,000 ka “Mangin Mapinasensiahon”! nga Rehiyonal nga Kombension ang hiwaton sa bilog nga kalibutan sa sobra 500 ka lenguahe. Ang una sa sining face-to-face nga mga kombension ginhiwat sang Mayo 12 asta 14, 2023.

Ang isa sa sobra 1,800 ka tumalambong nga nag-attend sa kombension sa Newburgh Assembly Hall of Jehovah’s Witnesses sa Newburgh, New York, U.S.A., amo si Sister Khrystine Torres. Sia nagsiling: “Sang naghambal ang tsirman: ‘Welcome,’ nagpinalakpak ang tanan nga nag-attend. Nalipay gid ang tanan nga makaupdanay na liwat.” Si Brother Duane Smith, nga nag-attend man, nagsiling: “Grabe gid ang kalipay sang tanan. Makita mo gid nga nalipay ang mga kauturan nga makaupdanay liwat.”

Si Sister Jessica Dolcemascolo, nga nabawtismuhan sang pandemic, wala pa gid naka-attend sa face-to-face nga kombension. Amo sini ang ginsiling niya: “Grabe gid ang kalipay, gugma, kag ang kasadya didto. Daw pareho lang nga nakita ko ang akon pinakasuod nga abyan pagkatapos sang malawig nga tion nga wala kami nakakit-anay.” Ang 18 anyos nga si Sister Noemi Tinajeronga nga ginbawtismuhan sini lang nga tuig, nagsiling: “Makita mo ang malipayon nga mga pamilya, ang malipayon nga mga mag-abyan. . . . Pamatyag ko daw ara na kami sa bag-o nga kalibutan.”

Madamo ang nanamian sang tema sang programa. Si Brother Sam Huh nagsiling: “Madamo ang nabudlayan magpakita sang pasensia. Gani isa gid ini ka maayo nga pahanumdom nga kinahanglan naton ilugon ang matahom nga halimbawa ni Jehova sa pagpasensia.” Si Sister Frenchie Smith nagsiling: “Gintudluan ako sini nga kombension nga importante ang pasensia sa tanan nga bahin sang akon kabuhi. Magamit ko gid ang akon natun-an sa bilog nga programa.”

Napalig-on gid ang mga naka-attend sa sining una nga kombension sa Newburgh, New York! Ginapaabot na gid naton, upod sa minilyon sa bilog nga kalibutan, nga makabenepisyo man kita sa sining ginhanda nga base sa Biblia nga programa sa masunod nga mga binulan.—Salmo 122:1.