Ginapaabot nga matapos sa tig-ilinit sang 2023 ang pagtukod sang duha ka panalgan nga visitor center sa Watchtower Educational Center sang mga Saksi ni Jehova sa Patterson, New York, U.S.A. Nagalapad ini sing 2,787-metros-kuadrados. May museum ini nga may tatlo ka permanente nga mga gallery kag isa ka rotational gallery, kag makaakomodar ini sing 1,200 ka bisita kada adlaw. Dugang pa, gin-renovate man ang madamo nga bilding kag gin-islan ang mga kagamitan para sa heating kag cooling system, wiring para sa elektrisidad, kag mga tubo sa plumbing nga daan na. Mga 40 porsiento na ang natapos sa sini nga proyekto.

Ang mga utod nga nagadumala sini nga proyekto may pila ka problema bangod sang COVID-19 nga pandemic. Bangod sini, diutayan lang mag-untat ang proyekto kay kulang ang suplay sang mga materyales. Halimbawa, sa isa ka pinakaimportante nga bahin sang pagpanukod, kulang ang suplay sang semento, pero nakapangita sing paagi ang mga utod nga matapos nila ang isa ka daku nga bahin sang salog nga semento suno sa iskedyul. Nagmahal man katama ang steel, pero nakabakal sini ang mga kauturan sa kasarangan lang nga presyo kay may kontrata na sila sa ila ginabaklan.

Sang gin-lockdown ang Bethel, gin-obra sang mga remote volunteer ang mga plano kag desinyo sang mga bilding amo nga wala ini maatrasar. May tinion man nga daw imposible nga makigkita sa mga opisyales sang banwa kay may mga protocol kag mga restriksion nga ginapatuman bangod sa pandemic, amo nga naghinay ang pagpanghanda sa proyekto. Pero paagi sa pagpakig-angot sing maayo sa mga departamento sa Bethel kag sa mga opisyales sang gobierno, nakakuha ang construction committee sang kinahanglanon nga mga permit suno sa iskedyul sa bulig sang mga remote volunteer kag sang videoconference.

Ang nagabag-obag-o nga mga guideline sa pag-quarantine naglimite sa pag-agda sa bag-o nga mga volunteer, amo nga nangin problema man ini. Pero sang mga Septiembre 2020, nangin posible na nga mag-imbitar sang bag-o nga mga full-time volunteer nga maistar kag maobra sa ginatukuran sang proyekto.

Si Sister Jennifer Paul gin-agda nga mag-obra sa proyekto sa tion sang pandemic. Parte sa konstruksion, sia nagsiling: “Nanamian ako mag-obra sing todo. Pero indi lang ang obra ang akon nanamian, kundi pati man ang mga upod ko sa obra. Makita mo ang pagpanghikot sang organisasyon ni Jehova kag ang iya panuytoy.”

Subong, may 440 ka volunteer, lakip ang mga 350 nga ara mismo sa lokasyon sang proyekto ang nagaobra sang visitor center sa Patterson kag sang mga bilding nga gina-renovate. Padayon nga nakita sang mga utod kon paano ginaaman ni Jehova ang tanan nga mga kinahanglanon para matapos ini nga proyekto.—1 Cronica 29:16.