Ang 1922 nga kombension sa Cedar Point, Ohio, U.S.A., madumduman gid sang mga Saksi ni Jehova. Kay man, isa ini ka importante gid nga okasyon bangod sa sini nga kombension nagpanawagan si Brother Joseph F. Rutherford nga ibantala ang Ginharian.

Pero ini nga kombension importante bangod sa isa pa ka rason: Narekord ini nga programa. Asta subong, wala gihapon sing may nakita nga kopya sini nga rekord.

Makita sa isa ka piktyur sining internasyonal nga kombension sang Septiembre 1922, nga may ara gamay nga stage nga ginatungtungan sang kamera nga ginagamit sa mga pelikula, para marekord ang pila ka bahin sining importante nga okasyon. Sadto nga tion, ini nga mga kamera bag-o pa lang ginagamit.

Posible nga madamo nga tawo ang nakatan-aw sang narekord nga kombension. Halimbawa, ang isa ka newspaper nag-advertise sini nga rekord. Ang advertisement nag-agda sa mga bumalasa nga “tan-awon ang Kombension sa ila Balay. Tan-awa ang imo mga Abyan, tan-awa ang pamulongpulong parte sa Bawtismo.” May panugda man ini parte sa pagbantala: “Hagara ang imo mga kaingod kag magbantala sa ila paagi sa sining narekord nga Kombension. Mag-order na.”

Kon may nabal-an ka nga kopya sang rekord sini nga kombension, palihug kontaka ang Museum Department sa MuseumDonations@jw.org ukon magsulat sa World Headquarters of Jehovah’s Witnesses sa 1 Kings Drive, Tuxedo Park, NY 10987. Nagalaum kami nga makita namon ining importante nga bahin sang kasaysayan sang mga Saksi ni Jehova.