Sang nagligad nga mga bulan, mga 362-kilometros kuadrados nga kagulangan ang nasunog sa California. Daku gid ang halit sini sa lugar.

Ang branch sa United States nagreport nga sobra sa 1,700 ka kauturan ang nagbakwit bangod sa mga sunog. Wala sang nahalitan ukon napatay. Pero sa sunog nga natabo sa Calimesa sang Oktubre 10, 2019, nasunog gid ang balay sang isa naton ka utod. May iban naman nga balay nga nahalitan bangod sang aso. Halos tanan sa mga nagbakwit nakapauli na sa ila mga balay.

“Importante gid nga magtuman sa sini nga mga sitwasyon,” siling sang isa ka gulang nga nagaistar sa isa sa mga nasunog nga lugar. “Insigida nga nagbakwit ang aton mga kauturan, gani ang mga bombero nakapokus sa pagpatay sang kalayo imbes nga magpangita sang mga tawo.”

Padayon nga ginaorganisar sang mga manugtatap sang sirkito kag mga gulang ang paghatag sang mga suplay sa mga nagbakwit. Dalayawon gid ang pag-ulikid kag pagkamaabiabihon sang mga kauturan sa malapit nga mga lugar nga wala nasunugan. Ang isa ka manugtatap sang sirkito nagkomento parte sa sini nga gugma, “Wala gid kami ginbudlayan sa pagpangita sang dalayunan para sa tanan nga nagbakwit.”

Ginapasalamatan naton kay Jehova ang mga “nagahatag sing daku nga lugpay” sa aton mga kauturan nga naapektuhan sini nga mga sunog.—Colosas 4:11.