Ang Bagyo Dorian nagwaswas sa Bahamas sang Septiembre 1 asta Septiembre 3, 2019. Antes pa mag-abot ini nga bagyo, ang branch sa United States nagsugod na sa pag-organisar sing bulig halin sa Florida, U.S.A. Sang puede na makabiyahe pagkatapos sang bagyo, ang mga kauturan nga may kaugalingon nga mga lantsa ukon mga eroplano naglakat para magbulig, amo nga sila ang isa sa pinakauna nga mga boluntaryo nga nag-abot sa mga isla.

Trese ka kauturan ang nagpiloto sang sobra 300 ka biyahe sa eroplano, para magdeliber sang 15 ka tonelada nga suplay sang bulig kag magdala sang sobra 700 ka boluntaryo pakadto sa ginbagyuhan nga mga lugar. Dugang pa, 13 ka lantsa sang aton kauturan ang gingamit para magdeliber sang halos 90 ka tonelada nga suplay. Ang isa ka biyahe sang lantsa pakadto-pakari halin sa Florida nagalawig sing 12 ka oras.

“Pagkatapos gilayon sang bagyo, ang mga eroplano [sang mga Saksi] nga puno sang mga suplay, naglupad dayon para magbulig,” siling ni Jose Cabrera, ang station manager sang Palm Beach International Airport sa Florida. “Halimbawa gid sila sang mga tawo nga handa gid maghimo sang ila pinakamasarangan sa pagbulig sa iban.”

“Kalabanan sa amon, amo pa lang makapiloto para sa hilikuton sang Ginharian,” siling ni Brother Glenn Sanders, nga isa sa mga piloto nga nagboluntaryo. ‘Kanami batyagon nga kita isa ka gamay nga bahin sang lawas, nga nagabulig sa iban nga bahin nga nagaantos.’—1 Corinto 12:26.

Ginabulubanta sang branch sa United States nga magagasto sing mga $1,750,000 (U.S.) sa sini nga pagbulig kag matapos ini sa Mayo 1, 2020.