Ang Bagyo Florence nagresulta sa pagbaha sa daku nga bahin sang North Carolina, South Carolina, kag iban pa nga estado. Ining Signal 4 nga bagyo nagpatay sing indi magkubos 32 ka tawo kag linibo ang nadulaan sing ilistaran.

Suno sa report sang branch office sa United States wala sing kauturan nga napatay ukon serioso nga nasamaran bangod sa bagyo, bisan sobra 4,000 ka Saksi ang nadulaan sing ilistaran. Bisan pa nag-ayoayo na ang kahimtangan, indi gihapon makadtuan ang pila ka lugar bangod sa madalom nga baha. Suno sa pinakaulihi nga report, 351 ka balay sang aton mga kauturan kag 21 ka Kingdom Hall ang naguba.

Ginatatap sang Disaster Relief Committee (DRC) ang pag-aman sang mga pagkaon, tubig, bayo, madayunan, kag kinahanglanon nga mga bulong sang mga biktima. Nalakip man sa mga nagabulig amo ang duha ka grupo sang mga boluntaryo nga nagapanghawan sang natumba nga mga kahoy bangod sa bagyo. Bangod sa baha pagkatapos sang bagyo, ang mga boluntaryo halin sa lokal nga kongregasyon kag iban pa nga gin-imbitar nag-abot para magbulig sa idalom sang pagdumala sang DRC. Ang mga gulang sa sina nga lugar kag mga manugtatap sang sirkito nagabisita sa mga biktima para palig-unon sila.

Ginalakip gid naton sa aton mga pangamuyo ang mga kauturan nga nabudlayan sa ila kahimtangan bangod sa bagyo nga nag-agi kag nagalaum kita sa tion nga “indi [na kita] magkahadlok.”—Isaias 12:2.