Ang kasaysayan sang mga Saksi ni Jehova nagsugod sa United States sang mga dekada 1870, sang si Charles Taze Russell kag ang iya mga kaupod naghimo sang isa ka klase para tun-an ang Biblia. Sa nagsunod nga mga tinuig, naghimo sila sang mga literatura, nagporma sang isa ka korporasyon nga nakilal-an sang ulihi nga Watch Tower Bible and Tract Society of Pennsylvania, kag nagpatindog sang una nga headquarters sa Allegheny, Pennsylvania.

Hilway nga mahimo sang mga Saksi ni Jehova sa United States ang mga hilikuton sang ila relihion. Pero, sang una nga mga tinuig sang ­ika-20 nga siglo, grabe gid ang paghingabot sa ila bangod sa sala nga mga impormasyon nga nabatian sang mga opisyal sang gobierno kag sa impluwensia sang mga klero. Sang dekada ’30 kag dekada ’40, madamo nga kaso sa korte ang gin-atubang sang mga Saksi. Gin-aresto sang mga pulis ang mga Saksi kay nagabantala sila, ang mga bata sang mga Saksi ginapahalin sa eskwelahan kay indi sila magsaludo sa bandera, kag linibo ka pamatan-on nga lalaki nga Saksi ang ginsentensiahan sang mga federal court nga mapriso kay indi sila magsoldado. Sang ulihi, ginpaboran sang Supreme Court sang United States ang mga Saksi sa sini nga mga isyu.

Asta subong, 50 na ka kaso ang nadaug sang mga Saksi sa Supreme Court. Nagdaug man sila sa madamo nga kaso sa mga state court kag federal court sa bilog nga pungsod parte sa kinamatarong sang pasyente, kustodiya sa bata, zoning, diskriminasyon sa obra, kag pagsaylo sa iban nga pungsod. Ini nga mga kadalag-an nakabulig para makahimo sang mga kasuguan kag masigurado ang kahilwayan sa paghambal, pagbalita, pagtipon, kag relihion sa United States. May positibo man ini nga impluwensia sa mataas nga mga korte sa bilog nga kalibutan.