Sang Abril 19, 2019, sa una nga tion sa sulod sang mga tinuig, nahiwat na sa publiko sang aton kauturan sa bilog nga Uzbekistan ang Memoryal sang kamatayon sang Cristo.

Ang mga Saksi ni Jehova sa Uzbekistan narehistro lamang sa Chirchik, isa ka siudad malapit sa Tashkent. Sang nagligad nga tinuig, ang aton kauturan sa gua sang Chirchik patago nga nagahiwat sang Memoryal para indi sila pagdakpon sang mga pulis. Sini nga tuig, ginpahibalo sang kauturan sa mga pulis ang parte sa pagsaulog sang Memoryal kag gin-agda sila nga magtambong. Mabinuligon gid ang mga pulis kag ginsigurado gid nila nga wala sing malain nga matabo sa mga nagtambong. Sa iban nga lugar, may mga pulis pa gani nga nagtambong mismo sa Memoryal.

Si Brother Mark Sanderson nga miembro sang Nagadumala nga Hubon ang nagpamulongpulong sa Memoryal sa Kingdom Hall sa Chirchik, subong sang makita sa piktyur. Ang program gin-translate sa Russian. Nakalab-ot sa 781 ang nagtambong. Ginsundan pa gid ini sang duha pa ka pagsaulog sang Memoryal sa amo gihapon nga Kingdom Hall sina man nga gab-i.

Sa sina nga pagbisita, si Brother Sanderson, nga gin-updan ni Paul Gillies halin sa world headquarters kag sang duha pa ka brother halin sa Central Asia, nakigkita sa mataas nga mga opisyal sang Ministry of Justice kag sang National Centre for Human Rights. Sa ila pag-istoryahanay, ang aton kauturan ginpasugtan nga maghatag sing sibu nga impormasyon parte sa aton mga ginapatihan kag organisasyon. Ginalauman nga kon mahibaluan sang mga opisyal ang dugang pa nga impormasyon parte sa aton, suportahan nila ang pagrehistro sa aton sa iban pa nga komunidad nga indi sakop sang Chirchik, kag makabulig ini sa kauturan nga makatigayon sing mga pasilidad para sa pagsimba.

Ang pagsaulog sang Memoryal sa publiko kag ang matinahuron nga pagpakigkita sa mga opisyal amo ang pinakaulihi nga positibo nga butang nga natabo Uzbekistan. Sang nagligad nga anom ka bulan, wala sing natabo nga pagpang-raid, pagmulta, ukon pag-aresto sa mga Saksi ni Jehova. Kag halos mga isa ka tuig na ang nagligad, sang Mayo 14, 2018, si Mr Javlon Vakhabov, nga ambassador sang Uzbekistan sa United States, nagpahayag sa publiko nga panikasugan sang parlamento nga bag-uhon ang mga kasuguan para mangin mahapos sa mga Saksi ni Jehova nga makaparehistro.

Nagasalig kita nga pakamaayuhon ni Jehova ang panikasog sang aton kauturan sa Uzbekistan nga padayon nga mangin “matawhay kag malinong nga may bug-os nga diosnon nga debosyon kag pagkaserioso.”—1 Timoteo 2:2.