Sa sulod sang madamo nga tinuig, may mga Saksi ni Jehova na sa Uzbekistan antes pa ini nangin independiente nga pungsod sang 1991. Sang 1992, ginpatuman sang Uzbekistan ang konstitusyon nga nagaamlig sa panguna nga mga kinamatarong sang tawo. Pero, pirme ginabalewala sang gobierno ang mga prinsipio sa sini nga konstitusyon parte sa kahilwayan sa relihion.

Wala gid ginrehistro sang mga awtoridad sang Uzbekistan ang tanan nga kongregasyon sang mga Saksi ni Jehova magluwas sa isa ka kongregasyon sa Chirchik. a Gani ginakabig nga ilegal ang bisan ano nga relihioso nga pagtinipon sang mga Saksi ni Jehova nga wala ginahiwat sa Kingdom Hall sa Chirchik. Pirme ginagamo sang mga pulis ang mga pagtinipon sa iban nga mga lugar, bisan ang pagtinipon sa mga balay. Ginaaresto nila ang mga naga-attend kag ginakumpiskar ang personal nga pagkabutang kag mga literatura. Gin-detain pa gani sang mga opisyal sing pila ka adlaw ang iban nga Saksi kag ginsakit sila kag ginbuyayaw. Ang iban nga Saksi ginmultahan sing daku, ginsentensiahan nga guilty, kag ginpriso sing pila ka tuig bangod sang ila paghimo sang mga hilikuton sang ila relihion. Bangod wala ginrehistro sang pungsod ang mga Saksi, ang kinaandan kag malinong nga hilikuton sang ila relihion ginakabig nga krimen.

Padayon nga nagapakig-istorya ang mga Saksi ni Jehova sa mga representante sang gobierno, para maaprobahan ang pagparehistro sang mga kongregasyon sa bilog nga Uzbekistan, ilabi na sa Tashkent. Kon maaprobahan, makahatag ini sang proteksion kontra sa diskriminasyon kag mangin basihan para respetuhon ang kinamatarong sang mga Saksi sa kahilwayan sa pagsimba.