Madamo sing kabudlayan nga naeksperiensiahan subong ang aton mga kauturan sa Venezuela. Halimbawa, bangod sa kinagamo sa ila pungsod nagbudlay gid ang kabuhi sang mga tawo didto, kag padayon man sila nga naapektuhan sang COVID-19 nga pandemic. Pero bisan pa sini, nakakita sila sing paagi nga maselebrar ang Memoryal sang kamatayon sang Cristo kag maimbitar ang iban nga magtambong sa sini nga okasyon.

Halimbawa, duha ka semana antes sang Memoryal, may nagtiniruhay kag nagkinagamo sa La Victoria, Apure State, malapit sa dulunan sang Colombia. Ang tanan nga manugbantala sa kongregasyon didto nalagyo sa Colombia. Ginbuligan sang mga kauturan sa Arauquita Congregation sa Colombia ang mga kauturan halin sa Venezuela nga makakonek sa Memoryal.

Ang isa ka kongregasyon sa Falcón State ara sa lugar nga wala sing telepono kag Internet. Gani, gin-transmit sang kongregasyon ang pamulongpulong sa Memoryal sa 70 ka manugbantala gamit ang mga walkie-talkie.

Ang isa ka sister nagsiling: “Bisan pa indi namon mahakos kag makita ang kada isa, mabatian namon ang tingog sang mga kauturan. Pamatyag namon kaupod lang namon sila.”

Inadlaw antes sang Memoryal, may ginhimo nga kahimusan ang mga kongregasyon para maimbitar ang mga tawo sa malayo nga mga lugar nga mamati sa programa. Madamo sing paagi nga ginhimo para mapamatian sang mga tawo ang pamulongpulong sa Memoryal. Sobra 3,000 ka imbitasyon ang napanagtag. Nangin madinalag-on gid ang ila ginhimo. Halimbawa, sa banwa sang Araya nga malapit sa baybayon, sobra isa ka gatos ka tawo ang namati sa pamulongpulong sa Memoryal paagi sa telepono.

May ginhimo man nga kahimusan ang branch sa Venezuela para ma-broadcast ang Memoryal sa 82 ka estasyon sang radyo kag 9 ka estasyon sang TV. Indi magnubo sa 8,000 ka kauturan lakip ang mga interesado ang nakapamati sing Memoryal sa sini nga paagi. Gin-broadcast man ang Memoryal sa iban pa nga lenguahe nga ginahambal sa Venezuela pareho sang Guahibo, Pemon, Piaroa, Pumé, Warao, Wayuunaiki, kag Yekuana.

Sa Guasipati, Bolívar State, masugod ang pag-broadcast sang Memoryal sa isa ka estasyon sang radyo sa alas 6:30 sang gab-i, kag isa lang ini ka bes i-broadcast. Pero pirme lang naga-brown out sa sini nga lugar. Gani, indi gid mapamatian sang mga tawo ang bilog nga programa sang Memoryal. Pero bangod nagkaproblema sa estasyon sang radyo, sobra pulo ka bes nga na-play ang pamulongpulong sa Memoryal sa bilog nga gab-i. Gani, napamatian sang mga tawo ang bilog gid nga pamulongpulong sa Memoryal sa sarisari nga oras. Suno sa report, sobra 600 ka tawo ang nakapamati. Ang isa ka brother nagsiling: “Maathag nga gusto gid ni Jehova nga mabatian sang tanan nga tawo ining pinasahi nga pamulongpulong.”

Bisan pa ‘nag-antos sang nanuhaytuhay nga pagtilaw’ ang aton mga kauturan, ‘nagakasadya gid sila’ kay nakita nila nga ginpakamaayo gid ni Jehova ang ila panikasog nga maselebrar ang Memoryal kag maimbitar ang iban.—1 Pedro 1:6, 7.