Ang kagamo kag krisis sa ekonomiya sa Venezuela nagapadayon gihapon. Mabudlay gid makatigayon sing pagkaon, tubig, gatong, kag bulong bangod diutay lang ang suplay kag mahal ini kaayo. Pirme wala sing kuryente gani naggrabe pa gid ang kakulang sing pagkaon, kay indi ini magdugay bangod indi ini mabutang sa refrigerator. Daku man nga problema ang krimen.

Bisan pa amo sini ang kabudlay sang ila sitwasyon, sobra 136,500 ka manugbantala sa Venezuela ang mapisan gihapon sa pagministeryo. Halimbawa, sang Enero 2019, bisan pa nabuhinan sing 7,000 ang mga manugbantala sa pungsod kon ikumparar sa nagligad nga tuig, ang ila gingamit nga oras sa ministeryo nagdugang sing 90,000 sangsa nagligad nga tuig. Sang Abril 2019, nakahiwat sila sing sobra 195,600 ka pagtuon sa Biblia. Ang mga regular payunir nagdamo man sing sobra sa 30,000. Sang tion sang pagpangagda sa Memoryal sang kamatayon sang Cristo, ang mga nag-auxiliary payunir nakalab-ot sa 20,400. Ang ila panikasog rason gid kon ngaa halos 471,000 ang nagtambong sa Memoryal—tatlo ini ka pilo sangsa kadamuon sang manugbantala. Dugang pa, madamo man ang nagatambong sa mga miting sang kongregasyon. Ang isa ka rason amo ang padayon nga pagsugid sang kauturan sang mensahe sang Biblia sa mga tawo nga nagapangita sang masaligan nga solusyon sa ila mga problema.

Ang sanga sa Venezuela padayon nga nagaorganisar sang bulig para mapadal-an ang aton kauturan sang pagkaon nga ila kinahanglan. Kada bulan, sa bulig sang kaingod nga mga sanga kag sa maalwan nga donasyon sa bug-os kalibutan nga hilikuton, ang sanga sa Venezuela nagapadala sing ginatos ka tonelada sang gindonar nga pagkaon sa 75,000 ka manugbantala sa 1,595 ka kongregasyon.