Sang Hulyo 1, 2023, gin-release ni Brother Ian Jefferson, isa ka miembro sang Branch Committee sa Zambia, ang libro sang Mateo sa Biblia sa Zambian Sign Language (ZAS) sa isa ka espesyal nga programa nga ginhiwat sa Assembly Hall sa Lusaka, Zambia. Ang nagtambong sa sini nga okasyon, 922. Amo ini ang una nga libro sa Biblia nga gin-release sa sini nga lenguahe. Puede na ini ma-download sa jw.org kag sa JW Library Sign Language app.

Ang una nga ZAS nga kongregasyon ginporma sang Marso 2008. Sang 2012, ginsugdan ang translation team sa branch office sa Lusaka. Subong, halos 500 ka manugbantala ang nagaalagad sa 16 ka ZAS nga kongregasyon kag 11 ka grupo sa bilog nga pungsod.

Sa pamulongpulong ni Brother Jefferson, ginbasa niya ang Mateo 18:22 para ipakita nga ini nga translation naggamit sang simple kag maathag nga mga tinaga. Nagsiling sia nga ini nga bersikulo may 18 ka tinaga sa English. Ang literal nga translation sini mabudlay intiendihon sa ZAS. Pero, ang ideya sini gin-translate sa duha lang ka pagsenyas sa ZAS. Sia nagsiling: “Ining malip-ot kag simple nga translation, mahapos sundan kag intiendihon gani makabenepisyo gid sa Pulong sang Dios ang mga nagagamit sini.”

Ang pag-release sang libro sang Mateo sa ZAS dugang nga pamatuod nga si Jehova “nagadala sang kaluwasan sa tanan nga sahi sang mga tawo.”—Tito 2:11.