Halin sang Abril 13 asta Abril 27, 2024, ang mga Saksi ni Jehova halin sa sarisari nga lugar sang Zimbabwe nagpartisipar sa isa ka preaching campaign sa Chitonga (Zimbabwe) nga lenguahe. Sa Zimbabwe, madamo sa halos 300,000 ka mga tawo nga nagahambal sang Chitonga (Zimbabwe) ang nagaistar sa malayo nga mga lugar sa Binga District sa northwest nga bahin sang pungsod. Mabudlay gid makadtuan ang tanan nga tawo sa sini nga lugar bangod may ara lang mga 300 ka Saksi nga nagaalagad sa walo ka kongregasyon nga nagahambal sang Chitonga (Zimbabwe).

Madamo gid nga tawo ang nangin interesado sa maayong balita bangod sini nga kampanya. Sa isa ka kongregasyon, may 77 ka tawo nga interesado ang nag-attend sa una nga weekend meeting sa tion sang kampanya. Pagkasunod nga weekend, may 126 ka interesado ang nag-attend. Sa kabilugan, sobra 2,000 ka Bible study ang nasugdan.

Samtang nagabantala, nabisitahan sang aton mga utod ang isa ka compound kag gintamyaw sila sang isa ka babayi kag sang iya mga bata. Ang mga utod namangkot kon puede nila maistorya ang ulo sang pamilya. Sang nag-abot ang bana sang babayi, nagpakilala sia nga sia ang village headman, nga nagapanguna sa ila baryo. Nanamian gid sia sa respeto nga ginpakita sang mga utod paagi sa paghulat nga maistorya sia mismo. Excited gid sia nga ginpakita sa ila ang iya kopya sang Biblia sa Chitonga (Zimbabwe), kag ginpakita sang mga brother sa iya kon paano mag-Bible study. Naghimo sila sang kahimusan para mapadayon ang iya pagtuon sa Biblia. Ginpasugtan man sang lalaki ang mga utod nga magbantala sa iban pa nga compound nga ginadumalahan niya.

Duha ka brother ang nagbantala sa isa ka banwa kag nakilala nila ang isa ka lalaki nga nagsiling nga isa sia ka Saksi ni Jehova. Ginpaathag sang lalaki nga nabantalaan ang iya tatay sang mga Saksi sang 1993. Nag-Bible study ang iya tatay pero wala nakapadayon bangod pila ka beses sila nga nagsaylosaylo sang ila balay. Pagkasunod nga adlaw, gusto gid sang mga brother nga makilala ang tatay sang lalaki, gani isa ka oras kag tunga sila nga naglakat para makadtuan ang pamilya sang lalaki sa ila compound. Nalipay gid ang tatay nga makita ang mga brother kag nagsiling nga ginapangamuyo nila sang iya asawa nga makadtuan sila sang mga Saksi sina nga adlaw. Nagpasugot ang bilog nga pamilya nga magpa-Bible study, kag nag-attend sila tanan sa midweek miting sang kongregasyon. Gin-upod pa gani nila ang ila mga kaingod.

Nakilala sang isa ka sister nga si Alicia ang isa ka tigulang nga babayi nga nagpasugot dayon nga mag-attend sa miting. Sang nag-abot si Alicia para sugaton sia, nagahulat na ang babayi kag may gin-agda sia nga abyan nga updan sia. Pagkatapos sang miting, ang tigulang nga babayi nagsiling: “Sigurado gid nga kaupod ninyo ang Dios. Nakita ko gid ang gugma kag kaayo ninyo gani gusto ko gid mag-attend liwat.”

Nalipay gid kita upod sa aton mga kauturan sa Zimbabwe sa maayo nga resulta sini nga kampanya. Nagpahanumdom ini sa aton nga ang aton mapisan nga ‘pagsab-ug sang binhi’ sa tanan nga bahin sang kalibutan padayon nga magamadinalag-on.—Manugwali 11:6.