Sang Septiembre 29, 2022, ang High Court of Zimbabwe nagdesisyon pabor kanday Brother Tobias Gabaza, Brother Wonder Muposheri, kag Brother Jabulani Sithole, nga nag-antos sang diskriminasyon kay wala sila mag-entra sa relihioso nga seremonya bangod sa ila konsiensia.

Sang Oktubre 2020, ginpatawag ang tatlo ka brother sa korte nga gindumalahan sang lider sang village. Natabo ini bangod ginpilit sang isa pa ka opisyal sang village ang mga brother nga mag-entra sa isa ka seremonya sa ila lugar. Ini nga seremonya nagalakip sang pagtawag sa mga espiritu sang mga patay para mag-ulan, kag ginapaabot nga magaentra sa sini ang tanan nga nagaistar sa sina nga village. Bangod sa ila konsiensia nga nahanas sa Biblia, nagdesisyon ang mga brother nga indi magpartisipar sa sini nga seremonya.

Ang lider sang village nagdesisyon kontra sa aton mga brother kag ginpahog sila, kag ginpilit nga magpartisipar. Nagdesisyon ang aton mga brother nga mag-apelar sa Magistrate Court sa Chipinge.

Sang Enero 5, 2021, ang Magistrate Court nagdesisyon pabor sa aton mga brother. Pero, wala ginsunod sang mga opisyal sang village ang desisyon sang korte kag padayon nila nga ginpabudlayan ang aton mga brother. Dugang pa, ginalikawan sila kag ginamaltrato sang iban nga tawo sa ila lugar.

Bangod sining padayon nga diskriminasyon, ang aton mga brother nag-apelar sa High Court. Ang High Court nagsiling nga ginlapas sang mga opisyal sang village ang kinamatarong sang aton mga brother. Nagmando man ini sa mga opisyal nga dapat exempted ang aton mga brother sa bisan ano nga mga seremonya nga nagalapas sang ila konsiensia kag dapat bayaran man sila sang danyos.

Nagapati kita nga ini nga desisyon makabulig sa aton mga kauturan sa bilog nga Zimbabwe, kay ini nga mga seremonya ginahimo man sa bilog nga pungsod. Nagapasalamat gid kita kay Jehova sa sini nga desisyon.—Hulubaton 2:8.