OKTUBRE 3, 2023
ZIMBABWE
Ika-75 nga Anibersaryo sang Branch Office sa Zimbabwe
Ang Septiembre 2023, amo ang ika-75 nga anibersaryo sang branch office sang mga Saksi ni Jehova sa Zimbabwe. Subong, ang mga pasilidad sang branch ara sa Harare, ang kapital sang Zimbabwe.
Sang nag-umpisa sa pagbantala ang mga Saksi ni Jehova sa Zimbabwe, ang hilikuton sang mga kongregasyon ginadumalahan sang branch office sa South Africa. Sang 1932, nagpadala ang branch sa South Africa sang apat ka payunir para maghimo sang preaching campaign sa Zimbabwe, nga ginatawag sadto nga Southern Rhodesia. Wala magdugay madamo nga tawo ang nagbaton sang kamatuoran.
Halin sa wala pa tuo: Si Eric Cooke, si Myrtle Taylor, si Phyllis Kite, si Ruby Bradley, kag si George Bradley
Sang Nobiembre 1940, bangod sang nasyonalismo kag pagsuporta sa inaway, gin-ban ang pag-import kag pagpanagtag sang aton mga publikasyon. Madamo nga kauturan ang ginpriso sina nga mga tinuig bangod bilang mga Cristiano, neutral sila. Ginpadayon sang aton mga kauturan ang pagbantala sang maayong balita pero nagahalong gid sila. May maayo gid nga resulta ang ila pagpanikasog. Ginkuha ang ban pagligad sang anom ka tuig. Sang ulihi, ang kadamuon sang mga manugbantala sa pungsod nagdamo sing sobra tatlo ka pilo, nga naglab-ot sa 3,500.
Sang Septiembre 1, 1948, para suportahan ang pagdamo sang manugbantala, gintukod ang isa ka branch office sa Bulawayo, ang ikaduha nga pinakadaku nga siudad sa Zimbabwe. Si Brother Eric Cooke ang gintangdo bilang una nga branch servant. Sang ulihi, gin-assign sa branch sa Zimbabwe si George kag Ruby Bradley, si Phyllis Kite, kag si Myrtle Taylor, nga mga misyonero nga ginhanas sa Gilead.
Mapisan nga mga miembro sang pamilya Bethel sa Zimbabwe. Halin sa wala pa tuo: Isa ka brother nga nagahanda sang pagkaon para sa pamilya Bethel, isa ka Sign Language translation team sa Zimbabwe, kag isa ka sister nga nagaatipan sang mga tanom sa hardin
Sa masunod nga mga tinuig, padayon nga nagdamo ang mga manugbantala sa Zimbabwe. Gani para maatipan ang pagdamo, kinahanglan ang dugang nga mga pasilidad sa branch.
Mga literatura sa pulo ka lenguahe nga ginagamit sa teritoryo sang branch sa Zimbabwe
Ang pasilidad subong gintukod sa Harare kag gindedikar sang Disiembre 1998. Ginadumalahan sang branch office ang pag-translate sa pito ka lenguahe kag ginaatipan ang sobra 964 ka kongregasyon sa ila teritoryo. Sobra 46,000 ka kauturan ang nagabantala sang maayong balita, kag 120,702 ang nag-attend sa pagselebrar sang Memoryal sang kamatayon sang Cristo sang 2023.
Nalipay kita nga makita ang padayon nga pagdamo sang mga tawo nga nagaalagad kay Jehova sa Zimbabwe. Ini nga pagdamo pamatuod nga si Jehova pirme nagabantay kag nagaatipan sa mga mainunungon sa iya.—2 Cronica 7:16.
Basi Manamian Ka Man
KON PAANO GINAGAMIT ANG IMO MGA DONASYON
Mga Misyonero nga Ginapadala “sa Pinakamalayo nga Bahin sang Duta”
May ara kita sobra 3,000 ka mga misyonero nga nagaalagad sa sarisari nga pungsod. Paano ginaatipan ang ila mga kinahanglanon?