Sugod sang Abril 25 asta 29, 2023, ginhiwat ang Zimbabwe International Trade Fair (ZITF) sa Bulawayo, Zimbabwe. Ang ZITF isa sa pinakadaku nga eksibit sang pungsod, nga may 500 ka partisipante halin sa 22 ka pungsod. Sobra 60,000 ka tawo ang nagkadto sa sini nga fair. Ang mga Saksi ni Jehova may booth sa category nga education kag training.

Para mabuligan ang mga naghalin sa iban nga pungsod, ang mga literatura base sa Biblia available sa pulo ka lenguahe, lakip ang Zimbabwe Sign Language. Available man ang isa ka interactive nga pagtuon sa Biblia sa mga interesado. Pagkatapos sini nga fair, sobra 12,000 ka literatura base sa Biblia ang napanagtag kag sobra 450 ka tawo ang nangabay nga bisitahan sila sang mga Saksi ni Jehova. Si Sister Eucebiah Mukura, nga nag-greet sa mga bisita sa booth, nagsiling: “Madamo ang nagbaton sang libre nga interactive nga programa sang pagtuon sa Biblia. Nalipay gid ako nga madamo nga tawo ang gusto gid nga bisitahan sila sang mga Saksi ni Jehova.”

Available man sa booth ang New World Translation of the Holy Scriptures. Sang nabatian sang isa ka babayi nga may nagabasa sang translation sang Ndebele nga lenguahe, nagdayaw sia kay maathag ini kag nangayo sia sang kopya sini. Excited man nga ginpakita sang isa ka pamatan-on nga babayi sa isa naton ka sister nga gin-install niya sa iya cellphone ang JW Library nga app. Nagsiling sia nga ginhimo niya ini kay gusto man niya mabasa ang New World Translation.

“Kanami gid sini nga eksperiensia,” siling ni Sister Gillian Ellerman, nga nag-abiabi sa mga bisita. Madamo pirme sang mga bisita sa booth. Daku gid ini nga kadayawan kay Jehova!”

Makapalig-on gid makita nga ginagamit sang aton mga kauturan sa Zimbabwe ang tanan nga kahigayunan nga masugid sa iban ang “sibu nga ihibalo tuhoy sa kamatuoran.”—1 Timoteo 2:4.