Sa una nga mga binulan sini nga tuig, ang branch office sa Zimbabwe nakabaton sang sulat sang pagpasalamat halin sa duha ka institusyon sang pungsod: ang Dorothy Duncan Centre for the Blind and Physically Handicapped kag ang University of Zimbabwe. Nagsulat sila sa branch office para pasalamatan ang ila nabaton nga gin-donate nga mga kopya sang New World Translation kag ang iban pa nga publikasyon nga base sa Biblia sa braille. Ang University of Zimbabwe nagsulat: “Ang inyo gin-donate makabulig sa amon mga estudyante nga matun-an kon paano himuon ang husto. Nagabulig gid kamo sa mga tawo kag nagapasalamat gid kami sa inyo.”

Ang pag-donate sini nga mga literatura amo ang pinakaulihi nga ginhimo sang branch para buligan ang sobra 10,000 ka tawo nga bulag kag may diperensia sa panan-aw sa Zimbabwe. Sang 2017, nag-organisar ang branch sang isa ka special preaching campaign para mabantalaan ini nga mga tawo. Nalakip sa sini ang pag-asayn sang duha ka mag-asawa nga espesyal payunir para buligan ang mga kauturan nga mangin epektibo pa gid sa ila pagbantala sa mga tawo nga bulag ukon may diperensia sa panan-aw. Bilang resulta sini, subong, 46 ka Bible study ang nasugdan kag tatlo na ang nabawtismuhan.

Ang isa sa mga nabawtismuhan amo si Sister Mavies Chaya. Nakontak sia sang 2021 paagi sa telephone witnessing. Nagkadto sia anay sa mga faith healer para ipabulong ang iya mata, pero nadulaan sia sang paglaum sang wala nila sia mabulong. Sang matun-an niya ang promisa sang Biblia nga sa bag-ong kalibutan makakita na ang mga bulag, nabuhi ang iya paglaum. Duha ka beses sia nga naga-Bible study kada semana kag nabawtismuhan sia sang Abril 2022.

Samtang ginahulat naton ang tion nga ibalik ni Jehova ang panan-aw sang mga bulag, nalipay kita nga makita kon paano niya ‘ginahatagan sing kapawa kag paghangop’ ang mga nagapangita sa iya subong.—Salmo 119:130.