Halin sang Agosto 28 asta Septiembre 2, 2023, ginhiwat ang Zimbabwe Agricultural Show sa Harare, Zimbabwe. May ara sobra 500 nga nagpartisipar kag may sobra 250,000 nga nagbisita sa sining internasyonal nga exhibit. Ang mga kauturan sa sina nga lugar nag-set up sang booth nga may mga publikasyon sa English, Ndebele (Zimbabwe), kag Shona nga mga lenguahe. Sa kabilugan, halos 6,300 ka publikasyon ang napanghatag sang 79 ka kauturan nga nagpartisipar, kag 116 ka tawo ang nangabay sang Bible study.

Ang isa ka tin-edyer nga si Tamuka nagpalapit sa booth. Nakita niya ang mga libro nga Questions Young People Ask—Answers That Work, Volume 1 kag 2. Pero sang nabal-an niya nga ang mga Saksi ni Jehova nagatanyag sang libre nga interactive nga pagtuon sa Biblia, excited sia nga namangkot, “Puede ninyo ako sugiran sing dugang parte sa sining mga leksion sa Biblia?” Sang nakita niya ang isa ka demonstrasyon sang pag-Bible study gamit ang Magkabuhi sing Wala Katapusan! nga brosyur, nangabay sia sang Bible study. Naghimo sang kahimusan ang isa ka brother didto nga mapadayon ang pag-Bible study kay Tamuka.

May isa pa ka lalaki nga nagpalapit sa booth kag nagsiling nga nanamian gid sia sa mga Saksi kay mapainubuson sila kag mapisan sa pagbantala. Ginbasa sang isa ka brother sa booth ang Mateo 28:19, 20 sa lalaki kag ginpaathag nga importante gid para sa mga Saksi ni Jehova nga sundon ang sugo ni Jesus nga isugid ang mensahe sang Biblia. Nagsiling ang lalaki nga tani may amo man sia sina nga kaisog. Gintanyagan sang brother ang lalaki sang Bible study, kag malipayon nga ginbaton niya ini.

Ang isa ka babayi sa exhibit nagdayaw man sa kaayo kag kaugdang sang mga Saksi ni Jehova. Ang mga utod nagsiling sa iya nga ang pagtuon kag ang pag-aplikar sang Pulong sang Dios sa aton kabuhi amo ang nakabulig sa aton nga mapakita ina nga mga kinaiya. Ginpakita sa iya sang isa ka sister sa booth kon paano ginahimo ang pag-Bible study gamit ang Magkabuhi sing Wala Katapusan! nga brosyur. Nagdayaw gid ang babayi sa sarisari nga libre nga mga publikasyon, lakip ang para sa pamilya kag mga pamatan-on. Sa tapos sia makakuha sang pila ka publikasyon kag sang isa ka Biblia, nagpasugot sia nga magpa-Bible study kag nagsiling, “Amo ini ang pinakamaayo nga regalo nga nabaton ko!”

Ang aton mga kauturan nagbantala man sang indi pormal sa tion sang exhibit. Ang isa ka brother nakapakig-istorya sa isa ka babayi nga nagabantay sang iya booth. Sina man nga adlaw, ginpalapitan liwat sang brother ang babayi kag gintanyagan sia sang Biblia kag pila ka publikasyon. Nalipay gid ang babayi sa pagbaton kag nagsiling nga gusto man niya makabaton sang personal nga kopya sang Biblia pero wala gid sia nakakuha. Ginhatag niya ang iya contact number para mabisitahan sia sang isa ka sister sa ulihi.

Ang isa ka sister nga si Ranganai nagsugid man sang iya nabatyagan parte sa iya eksperiensia sa sining public witnessing. Nagsiling sia: “Sang nagligad nga tuig, nabudlayan gid ako nga makapakigbahin sa ministeryo bangod sang akon problema sa panglawas. Pero natun-an ko nga magpokus sa mga pagpakamaayo imbes sa mga kabudlayan. Ang kahigayunan nga makasuporta sa sini nga public witnessing isa gid ka pagpakamaayo. Naghatag ini sa akon sang kompiansa kag pagpalig-on nga kinahanglan ko.”

Nalipay gid kita sa sini nga mga eksperiensia kag proud nga makaalagad sing nahiusa upod sa aton mga kauturan sa Zimbabwe bilang “mga masigkamanugpangabudlay sang Dios.”—1 Corinto 3:9.