1 Corinto 2:1-16
2 Gani, sang nagkadto ako sa inyo, mga kauturan, wala ako magkadto agod magpadayaw sa inyo paagi sa pulong ukon kaalam nga nagapahayag sa inyo sang sagrado nga likom sang Dios.
2 Kay namat-od ako nga ipatuhoy ang inyo igtalupangod kay Jesucristo lamang, kag ang paglansang sa iya sa usok.
3 Kag nagkadto ako sa inyo nga may kaluyahon kag kahadlok kag daku nga pagkurog;
4 kag ang akon pinamulong kag ang akon ginbantala indi paagi sa makabuluyok nga mga pulong sang kaalam kundi paagi sa pagpasundayag sang espiritu kag gahom,
5 agod ang inyo pagtuo mapasad, indi sa kaalam sang mga tawo, kundi sa gahom sang Dios.
6 Nagahambal kita sang kaalam sa tunga sang mga hamtong, apang indi ang kaalam sini nga sistema sang mga butang ukon sang mga manuggahom sini nga sistema sang mga butang, nga magakawala.
7 Kundi nagahambal kita sang kaalam sang Dios sa isa ka sagrado nga likom, ang natago nga kaalam, nga gintuyo na nga daan sang Dios sang wala pa ang mga sistema sang mga butang para sa aton himaya.
8 Wala sing isa sa mga manuggahom sini nga sistema sang mga butang ang nakahibalo sini nga kaalam, kay kon nahibaluan nila ini wala kuntani nila ginlansang sa usok ang mahimayaon nga Ginuo.
9 Kundi subong sang nasulat na: “Wala makita sang mata kag wala mabatii sang dulunggan, kag wala mahantop sang tagipusuon sang tawo ang mga butang nga ginhanda sang Dios para sa mga nagahigugma sa iya.”
10 Kay ginpahayag ini sang Dios sa aton paagi sa iya espiritu, kay ginausisa sang espiritu ang tanan nga butang, bisan ang madalom nga mga butang sang Dios.
11 Kay sin-o sa mga tawo ang nakahibalo sang mga butang sang isa ka tawo kundi ang espiritu lamang sang tawo nga yara sa iya? Gani, wala man sing isa ang makahibalo sang mga butang sang Dios, kundi ang espiritu lamang sang Dios.
12 Karon nabaton naton, indi ang espiritu sang kalibutan, kundi ang espiritu nga gikan sa Dios, agod mahibaluan naton ang mga butang nga mainayuhon nga ginhatag sang Dios sa aton.
13 Ini nga mga butang ginahambal man naton, indi paagi sa mga pulong nga gintudlo sang kaalam sang tawo, kundi paagi sa gintudlo sang espiritu, samtang ginapaathag naton ang espirituwal nga mga butang paagi sa espirituwal nga mga pulong.
14 Apang ang pisikal nga tawo wala nagabaton sang mga butang sang espiritu sang Dios, kay kabuangan ini sa iya; kag indi niya ini mahibaluan, bangod ginausisa ini sa espirituwal nga paagi.
15 Apang, ang espirituwal nga tawo nagausisa gid sang tanan nga butang, apang sia mismo wala ginausisa sang bisan sin-o nga tawo.
16 Kay “sin-o ang nakahibalo sang hunahuna ni Jehova, agod matudluan niya sia?” Apang kita may hunahuna ni Cristo.
